27 май, шанба куни Тошкент шаҳрининг Мустақиллик шоҳ кўчасида йўлни ажратувчи металл тўсиқлар олиб ташланди.
Бу ишга катта миқдордаги техника ва коммунал хизматлар ходимлари жалб этилган.
«Газета.uz»нинг ёзишича, айнан шу хизматлар 2015 йилнинг ёз ва кузида Ўзбекистон пойтахти Шанхай ҳамкорлик ташкилоти саммитига тайёргарлик кўраётганда кўчани ўнлаб километрини тўсиқлар билан ажратганди.
Ушбу демонтаж ишлари юзасидан на Тошкент шаҳар ҳокимлиги, на бошқа масъул ташкилотлар расмий ахборот берган. Йўл-ҳаракати хизмати инспекторининг нашрга маълум қилишича, тўсиқларни олиб ташлаш қарори йўл ҳаракати хавфсизлигини оширишга хизмат қилади.
Аввалроқ Тошкент шаҳри ҳокимлиги таклифига асосан жаҳонга машҳур даниялик архитектор Ян Гейл Ўзбекистонда бўлган эди. У «йўл ўртасидаги ажратувчи тўсиқларни олиб ташлаш,.. одамларнинг йўллардан ўтишини осонлаштириш... орқали шаҳарни янада қулай қилиш мумкин»лигини таъкидлаган эди.
Изоҳ (0)