Ўзбекистон Республикаси Президенти девонининг Фуқароларнинг ҳуқуқларини ҳимоя қилиш, жисмоний ва юридик шахсларнинг мурожаатлари билан ишлашни назорат қилиш ва мувофиқлаштириш хизмати масъул ходимлари Сурхондарё вилоятида сайёр қабуллар ўтказди. Бу ҳақда ЎзА хабар бермоқда.
Термиз шаҳри ва туманларда ўтказилган қабулларда вилоятда мурожаатлар билан ишлаш маданиятини юксалтириш, фуқароларни ўйлантираётган масала ва муаммоларга жойида ечим топиш борасидаги ишлар атрофлича таҳлил қилинди. Ўртага ташланаётган масалаларнинг ҳуқуқий ечимини тўғри тушунтиришга алоҳида эътибор қаратилди.
Жорий йилнинг 23 май кунига қадар Президентнинг виртуал қабулхонасига Сурхондарё вилоятидан 10 мингга яқин мурожаат келиб тушган. Вилоят ҳокимлиги ва бошқа мутасадди идоралар томонидан уларнинг 9 минг 357 тасига тегишли жавоб берилган. Айрим шикоятлар рад этилган.
Сайёр қабулда фуқароларнинг соғлиқни сақлаш масаласига оид бир қатор мурожаатлари тингланиб, жойида ҳал этилди.
— Президентнинг виртуал қабулхонасига вилоятдан тушган мурожаатларнинг 591 тасида фуқаролар даволаниш учун моддий ёрдам сўраган бўлса, 12 тасида ногиронларни протез-ортопедия ва реабилитация воситалари билан таъминлаш масаласи қўйилган, — дейди вилоят соғлиқни сақлаш бошқармаси бошлиғи вазифасини бажарувчи А.Норқобилов. — Шунга мувофиқ, ходимларимиз хонадонма-хонадон юриб, одамларнинг соғлиғи, турмуш шароити ва эҳтиёжларини ўрганди. Шу асосда тегишли чоралар белгиланди. Жорий йилнинг ўтган ойларида 213 киши ногиронлик аравачаси билан таъминланди. Яна 50 та аравачага буюртма берилган.
Очиқ мулоқотда Термиз туманидаги «Солиобод» маҳалласидаги намунавий уйларда истиқомат қилаётган бир гуруҳ фуқаролар уйларнинг қурилишидаги камчиликлар, кўчадаги тунги ёритиш чироқлари ишламаслиги, ички йўллардаги аҳвол, ичимлик суви таъминоти талабга жавоб бермаслиги юзасидан мурожаат қилди.
— Маҳаллий ҳокимлик ҳам, қурувчилар ҳам бу масалани ҳал этолмади, — дейди фуқаро Гавҳар Хўжамуродова. — Сайёр қабулда муаммо қонун доирасида кўриб чиқилиб, ҳал этилиши айтилди. Мурожаатимиз бевосита назоратга олинганидан хурсандмиз.
Президентнинг виртуал қабулхонасига вилоятдан тушган мурожаатларнинг 417 тасида ичимлик суви, 347 тасида ички йўллар, 168 тасида газ таъминоти, 65 тасида электр энергиясидаги узилишлар ва бошқа масалалар кўтарилган. Бундай муаммоларни тезроқ ҳал этиш учун кенг кўламли қурилиш-бунёдкорлик ишлари амалга оширилмоқда.
Вилоятда ўтказилган сайёр қабуллар ечимини кутаётган муаммолар кўплигини кўрсатди. Уларни бартараф этиш учун халқ билан маҳаллий ҳокимлик ва бошқа давлат идоралари ҳамкорлигини янада мустаҳкамлаш зарурлиги таъкидланди.
Уй-жой билан таъминлаш, банк-кредит, таълим соҳаси, ҳуқуқ-тартибот идоралари, солиқ ва бошқа назорат қилувчи органлар билан боғлиқ бир қатор мурожаатлар ҳам кўриб чиқилди. Уларнинг бир қисми шу ернинг ўзида ҳал этилди, қолганлари бўйича зарур тушунтиришлар берилди.
Изоҳ (0)