Буюк Британия бош вазири Тереза Мэйнинг маълум қилишича, мамлакатдаги террорчилик таҳдиди даражаси «энг хавфли»дан «жиддий»гача пасайтирилди. Бу ҳақда Meduza хабар бермоқда.
Мазкур қарор Манчестердаги теракт бўйича олиб борилаётган терговнинг муваффақиятли давом этаётгани муносабати билан қабул қилинган — террорчилик таҳдиди даражаси айнан Манчестердаги терактдан сўнг оширилган эди. Мэйнинг сўзларига кўра, ҳозирги вақтда мазкур иш бўйича 11 нафар гумонланувчи ҳибсга олинган.
«Жамият бунинг нима англатишини билмоғи лозим: ‘жиддий’ дегани террорчилик хуружи эҳтимоли юқори эканини билдиради. Мамлакат ҳушёр ва огоҳ бўлмоғи зарур», — деди бош вазир.
Манчестер шаҳрида хонанда Ариана Гранденинг концерти якунига етиши билан юз берган портлаш оқибатида 22 киши ҳалок бўлди, бир неча ўнлаб одам тан жароҳати олди.
Тергов маълумотларига кўра, портлаш 22 ёшли Салмон Обидий — ливиялик муҳожирларнинг фарзанди томонидан амалга оширилган. Полициянинг фикрича, теракт ортида бутун бошли тармоқ ҳаракат қилган; кетма-кет ўтказилган рейдлар натижасида Манчестер атрофида 11 нафар гумонланувчи, хусусан, эҳтимолий террорчининг акаси ҳам ҳибсга олинган; унинг бошқа бир акаси ва отаси Ливия махсус хизматлари томонидан қўлга олинган.
Теракт учун жавобгарликни ИШИД террорчилик ташкилоти ўз зиммасига олган.
Изоҳ (0)