British Airways авиакомпанияси 27 май куни Лондоннинг Хитроу ва Гатвик аэропортларидан амалга оширилиши керак бўлган барча рейсларни «глобал компьютер носозлиги» сабаб бекор қилди.
Meduza’нинг ёзишича, носозликлар сабаблари ҳақида ҳозирча ахборот йўқ. Компания вакиллари киберҳужум белгилари аниқланмагани маълум қилди.
BBC News хабарига кўра, носозликлар сабаб авиакомпания сайтининг бир қатор бўлимлари ишламай қолган, баъзи йўловчилар эса авиакомпаниянинг мобил дастури орқали рейс учун рўйхатдан ўта олмаганидан норозилик билдирган.
Хитроу ва Гатвик терминаллари йўловчилар билан тўлиб кетган (Буюк Британияда шанба куни уч кунлик узоқ муддатли дам олиш кунлари бошланган эди); авиакомпания йўлвочилардан аэропортларга келмасликни илтимос қилди.
Рейсларни амалга оширишга нисбатан чеклов маҳаллий вақт билан 18:00 (Тошкент вақти билан 22:00)га қадар амал қилади. Бошқа авиакомпанияларнинг самолётлари номи қайд этилган аэропортлардан одатдаги тартибда учиб кетмоқда.
Reuters’нинг қайд этишича, апрель ойида йўловчиларни самолётга чиқаришга халал берган техник носозликлар ҳақида Lufthansa ва Air France авиакомпаниялари ҳам хабар берган эди.
Изоҳ (0)