Тошкентда Кичик ҳалқа йўлининг Шота Руставели кўчаси билан кесишмаси яқинида бир аёл ўзини машина тагига ташлашга уринди. Ҳодиса видеоси йўлга бирдан югуриб чиққан аёлни уриб юборишига бир баҳя қолган автомобиль видеорегистратори орқали олинган.
«Яхши ҳам тезлик унчалик юқори эмасди ва орқадан келаётган машиналар ҳам оралиқ масофани сақлаб келаётган эди», — деб ёзади Facebook’нинг «Водители Ташкента (Drivers.uz)» гуруҳидаги видеохабар муаллифи.
Видеода йўлга югуриб чиққан аёлнинг асабий экани ва олдида базўр тўхтаган автомашина ҳайдовчисига қараб: «Бос!», деб бақираётгани кўриш мумкин. Шундан сўнг аёл қўшни полосага ўтиб кетган, ҳодиса қандай якунлангани номаълум.
Видеохабар остидаги муҳокама давомида бир гуруҳ Facebook фойдаланувчилари бу қилмиши учун аёлни жавобгарликка тортиш зарурлигини таъкидлаган, баъзилар уни фирибгарликда айблаган. «Шаҳарда шундай йўл билан кун кўрадиганлар кўпайиб кетибди», — деб ёзади фойдаланувчилардан бири.
Айни вақтда, аёлнинг асабий ҳолатда эканига эътибор қаратганлар ҳам бор. Хусусан, баъзи фойдаланувчилар аёлнинг ҳақиқатан ҳам «жонидан тўйган бўлиши мумкин»лигини таъкидлаган, унинг бундай ҳолга келишида баъзилар аёлнинг турмуш ўртоғини айблаган. «Катта эҳтимол билан, эри уни жонидан тўйдирган», — деган гуруҳ аъзоларидан бири.
21 май куни Амир Темур кўчасининг Тошкент телеминораси яқинидан ўтган қисмида бир аёл ўзини машина тагига ташлашга урингани акс этган видеоёзув тарқалган ва муҳокамаларга сабаб бўлган эди. Ўшанда ҳам фойдаланувчилар Тошкентда пул ишлаб олиш ёки ҳайдовчини «лаққа тушириш» мақсадида ўзини машина остига ташлаётган одамлар кўп учраётгани қайд этилган эди.
Аввалроқ Тошкент шаҳридаги Аёллар маслаҳат марказлари томонидан сўнгги уч йил давомида 35 нафар аёлнинг ўз жонига қасд қилиш ҳолатлари олди олингани маълум қилинган эди.
Изоҳ (0)