Toshkentda Kichik halqa yo‘lining Shota Rustaveli ko‘chasi bilan kesishmasi yaqinida bir ayol o‘zini mashina tagiga tashlashga urindi. Hodisa videosi yo‘lga birdan yugurib chiqqan ayolni urib yuborishiga bir bahya qolgan avtomobil videoregistratori orqali olingan.
“Yaxshi ham tezlik unchalik yuqori emasdi va orqadan kelayotgan mashinalar ham oraliq masofani saqlab kelayotgan edi”, — deb yozadi Facebook’ning “Voditeli Tashkenta (Drivers.uz)” guruhidagi videoxabar muallifi.
Videoda yo‘lga yugurib chiqqan ayolning asabiy ekani va oldida bazo‘r to‘xtagan avtomashina haydovchisiga qarab: “Bos!”, deb baqirayotgani ko‘rish mumkin. Shundan so‘ng ayol qo‘shni polosaga o‘tib ketgan, hodisa qanday yakunlangani noma’lum.
Videoxabar ostidagi muhokama davomida bir guruh Facebook foydalanuvchilari bu qilmishi uchun ayolni javobgarlikka tortish zarurligini ta’kidlagan, ba’zilar uni firibgarlikda ayblagan. “Shaharda shunday yo‘l bilan kun ko‘radiganlar ko‘payib ketibdi”, — deb yozadi foydalanuvchilardan biri.
Ayni vaqtda, ayolning asabiy holatda ekaniga e’tibor qaratganlar ham bor. Xususan, ba’zi foydalanuvchilar ayolning haqiqatan ham “jonidan to‘ygan bo‘lishi mumkin”ligini ta’kidlagan, uning bunday holga kelishida ba’zilar ayolning turmush o‘rtog‘ini ayblagan. “Katta ehtimol bilan, eri uni jonidan to‘ydirgan”, — degan guruh a’zolaridan biri.
21-may kuni Amir Temur ko‘chasining Toshkent teleminorasi yaqinidan o‘tgan qismida bir ayol o‘zini mashina tagiga tashlashga uringani aks etgan videoyozuv tarqalgan va muhokamalarga sabab bo‘lgan edi. O‘shanda ham foydalanuvchilar Toshkentda pul ishlab olish yoki haydovchini “laqqa tushirish” maqsadida o‘zini mashina ostiga tashlayotgan odamlar ko‘p uchrayotgani qayd etilgan edi.
Avvalroq Toshkent shahridagi Ayollar maslahat markazlari tomonidan so‘nggi uch yil davomida 35 nafar ayolning o‘z joniga qasd qilish holatlari oldi olingani ma’lum qilingan edi.
Izoh (0)