Германияда йўловчилар самолёт фюзеляжидаги тешикни пайқаб қолиб парвоздан бош тортишди

Дюссельдорфдан Штутгартга учаётган Air Berlin авиакомпаниясининг йўловчилари самолёт фюзеляжидаги (корпусида) тешикни пайқаб қолишди. Бу ҳақда Die Welt’га таяниб, «РИА Новости» хабар берди.

Воқеа 21 май кечаси содир бўлган. Air Берлин буюртмасининг рейсини Италиянинг Mistral Air компаниясига тегишли ATR 72-500 самолёти бажариши керак бўлган. Самолёт бортига кўтарилаётган йўловчилар орқа трапдан (зина) ярим метр нарида катта тешикни пайқаб қолишган.

Бу ҳақда экипажга хабар беришган, бироқ улар ҳавотир олишга ҳеч қандай асос йўқлигини айтиб, парвозга тайёргарлик кўра бошлаган. Икки йўловчи самолётни тарк этишни истаганидан сўнг ҳаво кемаси капитани тешикни бориб кўрган ва парвозни бекор қилган.

Авиакомпания мижозларининг маълум қилишича, аввалига капитан самолётни парвозга шай дея ҳисоблаган, бироқ йўловчиларнинг босими остида фюзеляжни яна бир бор текширишга рози бўлган. «Қандай қилиб ходимлар йўловчиларни шикаст етган самолётга чиқаришга кўндириши мумкин? Бугун ҳаво транспортининг хавфсизлиги борасидаги ишончим яхшигина ларзага келди», — деб ёзади Facebook’да йўловчилардан бири.