Dyusseldorfdan Shtutgartga uchayotgan Air Berlin aviakompaniyasining yo‘lovchilari samolyot fyuzelyajidagi (korpusida) teshikni payqab qolishdi. Bu haqda Die Welt’ga tayanib, “RIA Novosti” xabar berdi.
Voqea 21-may kechasi sodir bo‘lgan. Air Berlin buyurtmasining reysini Italiyaning Mistral Air kompaniyasiga tegishli ATR 72-500 samolyoti bajarishi kerak bo‘lgan. Samolyot bortiga ko‘tarilayotgan yo‘lovchilar orqa trapdan (zina) yarim metr narida katta teshikni payqab qolishgan.
Bu haqda ekipajga xabar berishgan, biroq ular havotir olishga hech qanday asos yo‘qligini aytib, parvozga tayyorgarlik ko‘ra boshlagan. Ikki yo‘lovchi samolyotni tark etishni istaganidan so‘ng havo kemasi kapitani teshikni borib ko‘rgan va parvozni bekor qilgan.
Aviakompaniya mijozlarining ma’lum qilishicha, avvaliga kapitan samolyotni parvozga shay deya hisoblagan, biroq yo‘lovchilarning bosimi ostida fyuzelyajni yana bir bor tekshirishga rozi bo‘lgan. “Qanday qilib xodimlar yo‘lovchilarni shikast yetgan samolyotga chiqarishga ko‘ndirishi mumkin? Bugun havo transportining xavfsizligi borasidagi ishonchim yaxshigina larzaga keldi”, — deb yozadi Facebook’da yo‘lovchilardan biri.
Izoh (0)