2017 йилнинг 17 май куни «Тошшаҳартрансхизмат» АЖ бошқарув раиси вазифасини вақтинча бажарувчи Х.Холматов раислигида жамият таркибидаги барча корхоналар раҳбарлари, мутасадди ходимлари иштирокида навбатдаги видеоселектор йиғилиши бўлиб ўтди. Бу ҳақда «Тошшаҳартрансхизмат» АЖ матбуот хизмати хабар берди.
Мазкур йиғилишда Х.Холматов 2017 йилнинг 12 ва 13 май кунлари ўтказилган йиғилишларда берилган топшириқларнинг ижроси тўғрисида ҳар бир автобус корхонаси раҳбарининг ҳисоботини тинглади. Автобус корхонаси раҳбарларига ишни тубдан яхшилаш ва фидокорона меҳнат қилиб ўзини кўрсатиш учун раҳбарларга берилган 10 кунлик муддатдан 5 куни ўтиб кетганини, ўтган вақт давомида сезиларли ўзгаришлар бўлмаганини танқид қилди.
«Тошшаҳартрансхизмат» АЖ тизимида ижобий ўзгаришлар қилиш ва аҳолининг розилигини олиш учун автобус корхоналари раҳбарларига берилган ўн кунлик муддатдан 5 куни қолганлигини таъкидлаб, ўтган 5 кун давомида ишни яхши томонга ўзгартирмаган раҳбарларни огоҳлантирди. «3-автобус саройи» МЧЖ директорининг тасарруф бўйича ўринбосари ўзига берилган топришиқларнинг бажарилишида масъулиятсизликка йўл қўйганлиги, ўз касбига совуққонлик билан ёндашганлиги, автобус ҳайдовчилари ўртасида тушунтириш ишларини етарлича олиб бормагани ва меҳнат интизомини сусайтириб юборгани учун уни эгаллаб турган лавозимидан озод этиш таклифи берилди.
Шунингдек, Ўзбекистон Республикаси Вазирлар Маҳкамасининг тегишли қарорига асосан Германиядан келтирилган 1,95 миллион евролик оригинал эҳтиёт қисмлар жамиятнинг «Тошавтотаъмирхизмат» УК томонидан қабул қилиб олингани ва ушбу эҳтиёт қисмларни узоқ муддатдан буён тўхтаб турган автобусларга қўйиб, йўналишларда ҳаракат мунтазамлигини кўтариш бўйича корхона раҳбарларига ва мутасадди ходимларга аниқ топшириқлар берилди.
Бундан ташқари ҳар бир автобусга ҳайдовчига қуёш нурининг тўғридан-тўғри тушиши олдини оладиган ҳамда кўринишини чекламайдиган махсус соябон (парда) ўрнатиш, жазирама кунларда йўловчиларга ва ҳайдовчиларга қулайлик яратиш мақсадида ҳар бир автобусга 3 тадан вентилятор мосламасини ўрнатиш бўйича автокорхона раҳбарлари мутасадди ходимларга вазифалар берди.
Йиғилишда яна бир масала кўриб чиқилди ва унга кўра ўзига юклатилган вазифаларни ўз вақтида бажармасдан масъулиятсизликка йўл қўйганлиги учун «Тошшаҳартрансхизмат» АЖ бошқарув раисининг молиявий масалалар бўйича ўринбосари М.Валиевни эгаллаб турган вазифасидан озод этиш таклифи берилди.
«Тошшаҳартрансхизмат» АЖ бошқарув раиси вазифасини вақтинча бажарувчи Х.Холматов томонидан юқоридаги вазифаларни амалга ошириш ҳамда шаҳар йўловчи транспортининг ишини янада яхшилаш, бошқарув ва иш олиб бориш тизимини тубдан ўзгартириш, соҳани ривожлантириш бўйича ҳар бир ходим фидойилик, ҳалоллик ва садоқат билан меҳнат қилиши лозимлигини таъкидлади.
Изоҳ (0)