Андижон вилоятининг Шаҳрихон туманида 15 май куни қайд этилган музқаймоқдан оммавий заҳарланиш ҳолати юзасидан Ўзбекистон Фавқулодда вазиятлар вазирлиги (ФВВ) ва Соғлиқни сақлаш вазирлиги (ССВ) икки кун ўтиб — 17 май куни расмий ахборот берди.
Жабрланувчилар. Фавқулодда вазиятлар вазирлиги ахборотига кўра, 15 май куни давомида Шаҳрихон тумани тиббиёт бирлашмаси ва Юқумли касалликлар шифохонасига қайт қилиш ва ич кетиши каби овқатдан заҳарланиш белгилари билан 212 нафар фуқаро мурожаат қилган. Соғлиқни сақлаш вазирлиги эса бироз бошқачароқ рақамни келтиради — 15 май куни соат 14:30 дан 22:00 гача бўлган оралиқда 186 нафар фуқаро туман тиббиёт бирлашмасига заҳарланиш белгилари билан ёрдам сўраб мурожаат қилган.ССВга кўра, 4 нафар беморнинг аҳволи ўртача оғирликда бўлгани сабабли, улар туман тиббиёт бирлашмасининг реанимация бўлимига ётқизилган (аввалроқ «Kun.uz» 5 киши реанимация жойлаштирилгани ҳақида хабар берган эди); муолажалардан сўнг аҳволи яхшилангач, улар шу куннинг ўзида умумий бўлимга ўтказилган.
ФВВнинг маълум қилишича, стационар ҳолатда даволаниш учун ётқизилган 186 бемордан 153 нафарига 17 май куни соат 8:00 гача уйига жавоб берилган. Қолган 33 бемор эса, ССВ ахбороти бўйича, 17 май куни соат 17:00 ҳолатига кўра, шифокорлар назоратида ва «уларнинг аҳволи ҳам яхшиланмоқда».
Заҳарланишнинг эҳтимолий манбаси ва сабаблари. «Беморларнинг барчаси туман марказида жойлашган ‘Макс’ кафесида музқаймоқ истеъмол қилганини айтди ва касалланишини шу билан боғлади», — дейилади ФВВ ахборотида. ССВ маълумотига кўра, жабрланувчиларнинг бари касалхонага мурожаатидан бир кун аввал — 14 майда Шаҳрихон марказидаги қаҳвахонада фрезерли музқаймоқ тановул қилган.
ССВ ахборотига кўра, қаҳвахонада музқаймоқ сотган тадбиркорнинг тадбиркорлик гувоҳномаси бўлган, бироқ музқаймоқ тайёрлаш учун керакли рухсатномаси бўлмаган. У ўз уйида «ноқонуний равишда музқаймоқ учун қоришма тайёрлаш цехи ташкил этган, музқаймоқ тайёрлаш жараёнида эса санитария талабларига риоя қилмаган».
Музқаймоқ қоришмалари озиқ-овқат маҳсулотларини ташиш мумкин бўлмаган пластмасса идишларда кафега олиб келинган. Музқаймоқ ишлаб чиқаришда яроқлилик муддатлари номаълум хом ашёлардан фойдаланилган. Музқаймоқ ускунасини ювиш ва зарарсизлантириш учун шароит яратилмаган, дезинфекция воситаларидан фойдаланилмаган.
Ҳозиргача кўрилган чоралар. ФВВнинг тасдиқлашича, Шаҳрихонда эпидемик вазиятни юмшатиш мақсадида 15 майдан Давлат бош санитар врачи — соғлиқни сақлаш вазири ўринбосари С.Сайдалиев раҳбарлигида республика ишчи гуруҳи фаолият олиб бормоқда. Давлат санитария-эпидемиология назорати маркази томонидан беморлар истеъмол қилган музқаймоқ ва ичимлик суви манбаларидан бактериологик ва кимёвий таҳлиллар учун намуналар олинган, улар текширилмоқда.
ФВВнинг қайд этишича, ҳодиса сабабларини аниқлаш мақсадида туман Ички ишлар бўлими томонидан суриштирув ишлари олиб борилмоқда. «Шаҳрихон туманида кузатилган эпидемик вазият алоҳида назоратга олиниб, барқарорлаштирилди», — дейилади ССВ ахборотида.
Изоҳ (0)