Ўзбекистон Республикаси ҳудудига махсус рухсатномасиз қурол яроғ, ўқ-дори ва уларнинг қисмларини олиб кириш тақиқланган. Самарқанд вилояти божхона бошқармаси «Самарқанд аэропорт» чегара божхона пости ходимлари мазкур тартибларга бўйсунишни истамаган, Внукова—Самарқанд йўналишидаги авиарейс билан учиб келган фуқаро А.Раҳимовнинг ҳуқуқбузарлигини фош қилди. Бу ҳақда Самарқанд вилояти Божхона бошқармаси матбуот хизмати хабар бермоқда.
Ушбу шахсга тегишли багаж божхона кўригидан ўтказилганда, унда йўловчи божхона декларациясида қайд этилмаган 2 турдаги 2 500 дона ов қуроли гилзаси капсулалари яширинча олиб кирилаётганлиги аниқланди.
Вилоят эксперт-криминалистика бўлими экспертлари хулосасига кўра, фуқаро А.Раҳимовдан ҳуқуқбузарлик ашёси сифатида олинган 2 минг дона сариқ рангли капсула (пистон)лар ов ўқ-дори турига кирмаслиги, тақдим этилган ҳолида ов патронлар қисми ҳисобланиши, шунингдек, 500 (беш юз) дона аллюмин рангли капсула(пистон)лар пластмасса гилзаларга қўйиб фойдаланиш учун мўлжалланганлиги, мазкур капсюллар фойдаланиш учун яроқли эканлиги кўрсатилган.
Самарқанд шаҳар Жиноят ишлари бўйича судининг 2017 йил 2 майдаги қарорига мувофиқ, фуқаро А.Раҳимов ҳуқуқбузарлик ҳолатини содир этган деб топилиб, унга қонунчиликда белгиланган таъсир чораси қўлланилди ҳамда ҳуқуқбузарлик ашёси сифатида олинган жами 2 500 дона гилза капсуласи давлат фойдасига мусодара қилинган.
Изоҳ (0)