15 май куни жаҳоннинг кўплаб оммавий ахборот воситалари, шу жумладан, «Дарё» ҳам Зимбабведа африкалик руҳонийни тимсоҳлар еб қўйгани ҳақида ёзиб чиққан эди. Аммо мазкур хабар ёлғон экани аниқланди, деб хабар беради Meduza.
Хабарга кўра, Зимбабведа учта тимсоҳ Исо Масиҳ сув устида қандай юрганини кўрсатиб бермоқчи бўлган черков арбобини еб қўйган. Руҳоний ўз шогирдларини кўл ёнига олиб келиб, Инжилда келтирилган мўъжизалардан бири — Исо Масиҳнинг сув устида юришини кўрсатиб бермоқчи бўлган. У сувга кириб, тахминан 30 метр юрган, энди қирғоққа чиқмоқчи бўлганида унга учта тимсоҳ ташланган.
Жаҳон матбуотида биринчилардан бўлиб бу ҳақда Нигериянинг Daily Post нашри ёзган, манба сифатида Zimbabwe Herald’ни кўрсатган эди. Аммо Zimbabwe Herald сайтида бу ҳақда ҳеч қандай маълумот йўқ.
Mashable нашри ушбу хабар илк бор 2016 йил ёзида Кениянинг EDaily янгиликлар сайтида нашр этилганини аниқлади. 2017 йил февралида у National News Bulletin ёлғон янгиликлар сайтида қайтадан чоп этилди ва у кейинчалик бошқа нашрларга манба бўлиб хизмат қилди.
Мазкур сайт ўзини «соф африканча сатира» деб атайди.
Изоҳ (0)