Тожикистоннинг Сўғд вилояти Спитамен туманида Тожикистондаги ягона ўзбек театри фаолият кўрсатади, деб ёзади Asia-Plus. Аммо у ҳақда интернетдан ҳеч қандай маълумот топиб бўлмайди. Шу туфайли нашр ушбу туманга бориб, театр фаолияти билан яқиндан танишди.
Шукур Бурҳонов номидаги давлат ўзбек драма театри Спитамен туманида фаолият бошлаганига 80 йилдан ошди. Бу ерда барча спектакллар ўзбек тилида қўйилади, чунки туман аҳолисининг катта қисми — ўзбеклар. Ўзбек театри директори Абдуқодир Яҳёев айтишича, спектакллар кўпи билан бир ойда икки марта қўйилади, ва ҳар сафар зал томошабинга тўла бўлади.
Театрда либосларни ўзлари тикишади, спектакллар учун реквизитларни ҳам ўзлари қилишади; актёрлар нафақага чиқмоқда, ёш мутахассислар эса театрда анчадан буён камёб. Бироқ ўзбек театри спектаклларида томошабинлар зални тўлдириб ўтиради, бунинг устига, уларнинг песалари экстремизм ва терроризм каби долзарб жамоатчилик муаммоларини қамраб олади.
«Ҳозир театрда етти нафар актёр қолди. Уларнинг ўртача ёши — 60 ёш, биз ёшлар билан ишлашга ҳаракат қиляпмиз, ҳатто истеъдодли ёшларни махсус ўқитишни ҳам бошладик, аммо уларнинг ҳаммаси ҳам профессионал эмас, ҳаваскорлар», — дея кадрлар билан боғлиқ муаммолардан гапирди директор.
Унинг сўзларига кўра, театр ҳар икки йилда бир марта Душанбеда бўлиб ўтадиган «Парасту» театр фестивалида қатнашади. Тожикистон Республикасида хизмат кўрсатган артист Тамара Абдушукурова ўзбек театрининг ушбу фестивалдаги иштирокини — танланган мавзу ва актёрлар ижроларини мақтади ҳамда Тожикистон учун ноёб бўлган ва ўзбек томошабинлар учун ягона бўлган коллективни сақлаб қолишга чақирди.
Изоҳ (0)