«Хазонрезги» фильмидаги роли учун Қирғизистонда «Ак илбирс» мукофотини қўлга киритган актриса Феруза Саидова ва шу фильм режиссёри Зулфиқор Мусоқов билан «Darakchi.uz» кичик интервью уюштирди.
— Феруза опа, аввало мукофот билан табриклаймиз! Учта номинация орасидан айнан қай бири ғолиб бўлади, деб ўйлагандингиз?
— «Ак илбирс» миллий мукофотига таклиф қилишганида, шунчаки меҳмон сифатида чақирилганмиз, деб ўйлагандим. Мен учун мукофотланишим кутилмаган ҳодиса бўлди. Чунки учта номинациядан «Марказий Осиёнинг энг яхши фильми» номинациясида ғолиблик насиб қилади, деган хаёлда эдим. Очиғи, ҳалигача англолмаяпман (кулади). Табриклар қуршовида қолдим, бунга ҳам аввалдан тайёр бўлиш керак экан.
— Режиссёр Зулфиқор Мусоқовнинг иштирок этолмаганидан афсуслангандирсиз-а?
— Албатта! Соғлиги сабаб боролмади. Тақдирлаш маросимидагилар буни тўғри тушунишди ва эзгу тилакларни етказиб қўйишимизни сўрашди.
— Зулфиқор ака, меҳнатингиз самараси билан муборакбод этамиз! Тақдирлаш маросимида нима сабаб қатнашолмадингиз?
— Раҳмат! Мукофот насиб қилганидан қувондим, албатта. Қатнашишни жуда истагандим, бироқ самолётда учишга қўрққаним боис боролмадим. Шунинг учун саккиз йилдан буён бирорта фестивалда иштирок этолмаяпман. «Ак илбирс» миллий мукофотининг тақдирлаш маросимига бош рол ижрочилари Феруза Саидова ва Баҳриддин Абдуллаев боришди.
Эслатиб ўтамиз, «Ак илбирс» мукофотга ўзбекистонлик режиссёр Зулфиқор Мусоқовнинг «Хазонрезги» фильми уч номинацияда номзод сифатида кўрсатилган эди. Тақдирлаш маросимида мазкур фильмдаги бош ролни гавдалантирган актриса Феруза Саидова «Марказий Осиёнинг энг яхши актрисаси» деб топилди.
Изоҳ (0)