Forbes Kazakhstan журнали мамлакатнинг 50 нафар энг бадавлат бизнесмени рейтингини эълон қилди.
Рўйхатни рангли ва қимматбаҳо металлар қазиб олиш ҳамда қайта ишлаш билан шуғулланадиган KAZ Minerals гуруҳи президенти Владимир Ким эгаллади. 2016 йил апрелидан бери Ким мол-мулкини 800 миллион долларга кўпайтириб, 2,5 миллиард долларга етказди.
Рейтингдаги иккинчи ўринда 2,4 миллиард доллар билан Қозоғистон теннис федерацияси раиси, йирик инвестор (ForteBank, Beeline Қозоғистон, Sky Mobile) Булат Утемуратов қайд этилди.
Рўйхатнинг учинчи ва тўртинчи ўринларини президент Нурсултон Назарбоевнинг куёви, Kazenergy ассоциацияси раиси Тимур Кулибаев ва унинг турмуш ўртоғи, давлат раҳбарининг ўртанча қизи Динара Кулибаева банд этди. Улар ўтган йили даромадларини 100 миллион долларга оширди ва эндиликда ҳар бири 2,2 миллиард долларга эгалик қилмоқда.
Қозоғистоннинг 50 нафар энг бадавлат бизнесменига тегишли жами мол-мулк 22,3 миллиард долларга етди. Бу Қозоғистон ялпи ички маҳсулотининг 16 фоиздан ошиғини ташкил этади.
Изоҳ (0)