Борган сари Американинг Техасдаги Мексика билан чегара қисмидан муҳожирлар жасади кўпроқ топилмоқда. 2009 йилда битта округнинг ўзида 500 нафар муҳожирнинг жасади ва қолдиқлари топилган, деб хабар берди Forum Daily.
Техасда ҳалок бўлган ноқонуний муҳожирлар божхона назоратини айланиб ўтиш мақсадида маҳаллий паст-баландликлар орқали чегарани кесиб ўтган. Уларнинг аксарияти сувсизликдан, иссиқлик уриши ёки гипотермиядан ҳалок бўлган.
Жасадлар ёки қолдиқлар топилгач, кейинчалик кузатиш ва имконият доирасида идентификация қилиш учун улар рақамлаб чиқилади.
«Бундан мақсад уларнинг кимлигини аниқлаш ва ўз исмларини қайтариб бериш», — деди жасадларни идентификация қилиш бўйича суд антропологи Тимоти Гоча.
Сўнгги йилларда Техасдаги чегарани кесиб ўтишда юзлаб иммигрантлар ҳалок бўлди. Яна юзлаб муҳожирлар Мексика билан чегарадош бошқа учта штатда — Аризона, Калифорния ва Нью-Мехикода ҳалок бўлган.
2014 йили расмийлар Жанубий Техасдаги ранчоларнинг биридан 9 та, бошқасидан 17 та, учинчисидан 31 та чириб кетган жасадни топган.
Статистикага кўра, 2017 йилнинг дастлабки ойларида топилган жасадлар сони бутун 2010 йил давомида топилганларга деярли тенг.
Муҳожирлар жасади калхатлар, ёввойи тўнғиз ва бошқа ҳайвонлар туфайли майдалаб ташланган.
Баъзида иммигрантлар табиатга қарши кураша олмай, сувсизликдан ва силласи қуриганидан ўзларини ҳибсга олиб, уйларига қайтариб юборишлари учун 911 га қўнғироқ қилишга ҳаракат қилади. Бу омон қолишнинг ягона йўли деса ҳам бўлади.
Изоҳ (0)