Ҳукумат сиёсатидан норози намойишчилар мамлакатнинг собиқ президенти Уго Чавеснинг ҳайкалини бузиб ташлади. Ҳодиса мамлакат шимоли-ғарбидаги Сулия штатининг Вилья-дель-Росарио ҳудудида содир бўлди. Бу ҳақда El Nacional нашрига таяниб, «Коммерсантъ» хабар берди.
Аввалроқ, Венесуэладаги намойишларнинг бир ойи давомида 35 киши ҳалок бўлгани ва 700 дан ортиқ одам жароҳат олгани маълум бўлган эди. Навбатдаги оммавий норозилик март ойида, президент Николас Мадурони қўллаб-қувватловчи Венесуэла Олий суди Миллий ассамблея (парламент) ўрнига ўзини қонунчилик органи деб эълон қилиб, депутатларни иммунитетдан маҳрум этиш ҳақида қарор чиқарганда бошланганди.
Мухолифат ушбу қарорни давлат тўнтаришига ҳаракат дея баҳолаган эди, кейин суд бу қарорни бекор қилди.
1 май куни Николас Мадуро мамлакат конституциясини ва амалдаги давлат тизимини ўзгартириш ҳуқуқига эга Конституциявий ассамблеяни чақириши ҳақида маълум қилган. Миллий ассамлея эса ушбу қарорни тасдиқлашдан бош тортди.
Изоҳ (0)