Hukumat siyosatidan norozi namoyishchilar mamlakatning sobiq prezidenti Ugo Chavesning haykalini buzib tashladi. Hodisa mamlakat shimoli-g‘arbidagi Suliya shtatining Vilya-del-Rosario hududida sodir bo‘ldi. Bu haqda El Nacional nashriga tayanib, “Kommersant” xabar berdi.
Avvalroq, Venesueladagi namoyishlarning bir oyi davomida 35 kishi halok bo‘lgani va 700 dan ortiq odam jarohat olgani ma’lum bo‘lgan edi. Navbatdagi ommaviy norozilik mart oyida, prezident Nikolas Maduroni qo‘llab-quvvatlovchi Venesuela Oliy sudi Milliy assambleya (parlament) o‘rniga o‘zini qonunchilik organi deb e’lon qilib, deputatlarni immunitetdan mahrum etish haqida qaror chiqarganda boshlangandi.
Muxolifat ushbu qarorni davlat to‘ntarishiga harakat deya baholagan edi, keyin sud bu qarorni bekor qildi.
1-may kuni Nikolas Maduro mamlakat konstitutsiyasini va amaldagi davlat tizimini o‘zgartirish huquqiga ega Konstitutsiyaviy assambleyani chaqirishi haqida ma’lum qilgan. Milliy assamleya esa ushbu qarorni tasdiqlashdan bosh tortdi.
Izoh (0)