Пуэрто-Рико таълим департаменти бошлиғи Йоланда Росали иқтисодий инқироз сабабли камида 184 та давлат мактаби ёпилишини маълум қилди. Унинг сўзларига кўра, май охирига қадар 27 минг нафар ўқувчи бошқа мактабларга жойлаштирилади. Бу ҳақда AP агентлигига таяниб, «Коммерсантъ» хабар берди.
Пуэрто-Рикода фаолият юритаётган 1292 та давлат мактабида жами 365 минг нафар ўқувчи таълим олади. Сўнгги 30 йил давомида мамлакат мактабларига қатнаш даражаси 42 фоизга тушиб кетди. Яқин йиллар ичида янада қисқариши кутилмоқда. Бундан ташқари, охирги ўн йил ичида ярим миллион одам АҚШга кўчиб кетган.
Аввалроқ маълум бўлганидек, жиддий иқтисодий инқирозни бошидан кечираётган Пуэрто-Рико ҳукумати кредит берувчилар билан қарзни қайтариш муддатини узайтириш борасида келишувга эриша олмади.
Ҳозирда мамлакатнинг облигациялар бўйича қарзи 73 миллиард долларни ташкил этмоқда, бундан ташқари ҳукумат қўлида 50 миллиард долларга яқин пул билан таъминланмаган нафақа облигациялари мавжуд.
Изоҳ (0)