Microsoft компанияси янги Surface планшетларини 23 май куни намойиш этиши мумкин

Microsoft компанияси май ойи охиригача янги гаджетлар тақдимотини ўтказишни режалаштирмоқда. Бу ҳақда «Коммерсантъ» хабар бермоқда.

Microsoft компаниясининг Surface қурилмалари ишлаб чиқарилиши учун масъул бўлган қурилмалар бўйича вице-президенти Панос Панайнинг маълум қилишича, 23 май куни компания Шанхайда тадбир ўтказади.

Панос Панай тадбир тафсилотларини маълум қилмади, бироқ ижтимоий тармоқда қолдирган хабарига #Surface ҳештегини илова қилиб қолдирди.

https://twitter.com/panos_panay/status/860311231093133313

Бу Surface Pro планшети ёки бутунлай бошқа, янги қурилма тақдимоти билан боғлиқ эълон бўлиши мумкин, деб ёзади TechCrunch нашри.

Microsoft компанияси 2 май куни янги Microsoft Surface Laptop ноутбуки ва Windows 10S операцион тизими тақдимотини ўтказган эди.