Ўзбекистон U22 термаси устози Жасур Абдураимов «Пахтакор»ни вақтинча бошқарадиган бўлди

Жасур Абдураимов «Пахтакор» футбол клубида бош мураббий вазифасини бошқарувчи бўлиб ишлайди. Бу ҳақда клуб матбуот хизмати хабар берди.

26 апрель куни Тошкент шаҳар ҳокими «Пахтакор»нинг янги раҳбариятини расман таништирганди. Ўша куннинг ўзидаёқ раҳбарият футболчи ва мураббийлар билан йиғилиш ўтказган. Вице-президент Бобур Шодиев бунда клубнинг яқин келажакдаги режалари борасида фикр билдирган.

Бош директор Умид Аҳмаджоновнинг қўшимча қилишича, футболчи ва мураббийлар билан мулоқотлар энди доимий бўлади.

Йиғилишда Жасур Абдураимов «Пахтакор» клубининг янги мураббийи сифатида таништирилди. Бунда мутахассис ўз лавозимида вақтинчалик ишлаши айтиб ўтилган, бироқ бу қанча вақтни ўз ичига олишига ойдинлик киритилмаган.

Маълумот учун, 6 апрель куни Равшан Ҳайдаров «Пахтакор»нинг янги бош мураббийи сифатида таништирилганди. «Шўртан» (0:3) ва «Локомотив» (1:2) клубларига қарши мағлубиятлардан кейин Равшан Акмаловичга чиқиш эшиклари кўрсатиб қўйилган.

Жасур Абдураимов эса бунга қадар Ўзбекистон U22 терма жамоасига устозлик қилаётганди. У бир вақтнинг ўзида икки вазифани бажарадими ёки амалдаги иш жойидан ариза ёздими — аниқлик киритилмаган.