Америка ҳаво маршали самолёт ҳожатхонасида тўппончасини унутиб қолдирди

Манчестердан Нью-Йоркка учаётган рейсни кузатиб бораётган Америка ҳаво маршали ўз тўппончасини ҳожатхонада унутиб қолдирди, деб хабар бермоқда The New York Times.

Нашрнинг маълум қилишича, қуролни самолёт йўловчилардан бири топиб олган ва экипаж аъзоларига топширган. Улар эса ўз навбатида тўппончани эгасига қайтарди.

Бўлиб ўтган воқеага қарамасдан ходим ишидан четлатилмаган, унга бошқа рейсларни кузатиб бориш вазифаси юкланган.

Можаро 6 апрель куни содир бўлганига қарамай, эндигина маълум бўлди. АҚШ транспорт хавфсизлиги маъмурияти бўлиб ўтган воқеадан хабарлари борлигини, бироқ идора вакиллари бу борада ҳеч қандай изоҳ бермаслигини маълум қилди.

Ҳаво маршаллари федерал хизмати (FAMS) — АҚШдаги ҳуқуқни муҳофаза қилувчи федерал агентлик, Ички хавфсизлик вазирлигининг (DHS) Транспорт хавфсизлиги маъмурияти (TSA) таркибида фаолият юритади. Махфий хизмат агентларининг вазифаси фуқаролик рейсларида йўловчиларга қарши зиддиятли вазиятларга ҳамда самолётларни олиб қочишга қарши курашишдан иборат.

«Дарё»нинг Telegram’даги расмий канали — @toshqindaryo’га аъзо бўлинг!