Вьетнам қишлоқларидан бирининг маҳаллий аҳолиси 20 нафар полициячини гаровга олди

Вьетнам пойтахти Ханойдан 50 километр узоқликда жойлашган Май Дюк қишлоғи аҳолиси 20 нафар полициячини гаровга олди, деб хабар берди BFMTV.

Можаро бир неча кун олдин содир бўлган: мансабдор шахслар тартибни сақлаш ходимлари ҳамроҳлигида (умумий миқдорда 38 киши) қишлоқдаги ерларни чегаралаш мақсадида келган. Расмийлар қишлоқ хўжалиги ерларнинг бир қисмини телекоммуникация компаниясига бинолар қуриши учун бериш ниятида бўлган.

Қишлоқ фаоллари барча келганларни қўлга олиб уларни бинолардан бирига қамаб қўйган. Уч нафар масабдор ва 15 нафар полициячи қочишга муваффақ бўлган, қолганлар эса аввалгидек гаровда. Маҳаллий фуқароларнинг сўзларига кўра, гаровга олингаларга яхши муносабат кўрсатилиб, овқат берилмоқда.

Шу билан бир вақтда қишлоқликлар ҳукумат куч ишлатиб гаровдагиларни озод қилишидан хавфсирамоқда. «Биз гаровдагилар жойлашган уй атрофига мой сепиб чиққанмиз. Агар полициячилар штурм уюштирадиган бўлса, уларни ёқиб юборишга тайёрмиз», — дейди маҳаллий фуқаролардан бири.

Вьетнамда барча ер давлатга тегишли. Ҳукумат ерларни тез-тез турли — уйлар, меҳмонхоналар ёки бошқа инфратузилма объектлар қуриш мақсадида олиб қўяди. Бу каби вазиятлар эса турли можароларни келтириб чиқаради. 2012 йилда балиқчилик фермаси эгаси билан содир бўлган можаро оқибатида етти нафар полициячи жароҳат олган эди.

«Дарё»нинг Telegram’даги расмий канали — @toshqindaryo’га аъзо бўлинг!