Россиянинг энг бадавлат бизнесменлари рўйхатида Алишер Усмонов 5, Искандар Маҳмудов эса 19-ўринни эгаллади

Forbes журналининг Россияда чоп этиладиган нашри мамлакатнинг 2017 йилдаги энг бадавлат тадбиркорлари рейтингини эълон қилди. 

Рейтингга 200 нафар бизнесмен киритилди. Уларнинг жами бойлиги йил давомида 100 миллиард долларга ошиб, 460 миллиард долларга етди. Рўйхатга «кириш» 500 миллион доллардан (ўтган йили 350 миллион доллар) бошланди. Рейтингнинг биринчи ўнлигида қайд этилиш учун тадбиркор 12,4 миллиард долларга (ўтган йили 8,7 миллиард доллар) эга бўлиши лозим. 

Мазкур рўйхатни қаторасига иккинчи йил «Новатэк» компанияси эгаларидан бири Леонид Михельсон 18,4 миллиард доллар билан бошқарди. Иккинчи ўринни «Северсталь» компанияси соҳиби Алексей Мордашов (17,5 миллиард доллар) эгаллади. Учинчи ўринда 16,1 миллиард доллар билан Новолипецк металлургия комбинати хўжайини Владимир Лисин қайд этилди. 

Алишер Усмонов рейтингда 15,2 миллиард доллар билан 5-ўринни эгаллади. Яна бир ўзбекистонлик Искандар Маҳмудов эса 6,5 миллиард доллар билан 19-ўринда қайд этилди.

Алишер Усмонов мазкур рўйхатда ўтган йилга нисбатан икки қатор пастлаган бўлса, Искандар Маҳмудов, аксинча, икки поғона юқорилади.

«Дарё»нинг Telegram’даги расмий канали — @toshqindaryo’га аъзо бўлинг!