Корея Республикасида сайловолди пойгада фаворит бўлиб турган Мун Чжэ Ин КХДРни ўз мамлакатининг асосий душмани деб аташдан бош тортди. Бу ҳақда у телевизион дебатлар чоғида айтиб ўтди, деб ёзади «ТАСС».
«Президентликка номзод бундай ҳамла билан ташланиши керак эмас, деб ҳисоблайман. Миллий мудофаа вазирлиги Шимолни душман деб аташи — ўзларининг иши, аммо президентликка номзод бундай дейиши маъқул эмас», — деди Мун Чжэ Ин.
«Шундай ҳолат бўлиши мумкинки, президентликка даъвогар сайланган тақдирда, у иккита Корея ўртасида тинчлик ўрнатиш мақсадида Пхеньян билан шахсан музокаралар олиб бориши ва тинч бирлашиш устида ишлаши керак бўлади», — дея аниқлик киритди у.
Мун Чжэ Иннинг расмий вакили кейинроқ президентликка номзоднинг бу гапи унинг «КХДРпараст йўналиши»дан далолат бермаслигини маълум қилди. Унинг сўзларига кўра, Мун Чжэ Ин сайловларда ғолиб чиққан тақдирда, «мудофаа вазирига Пхеньяннинг гижгижлашларига тўлиқ тайёр бўлишни буюради», аммо шу билан бир вақтда ташқи ишлар вазирига «Шимолий Корея ядро муаммосини тинч сиёсий ва дипломатик усуллар билан ҳал қилиш йўлларини қидириш»ни топширади. Бирлашув вазирлиги «Корея ярим оролидаги кескинликни Сеул ва Пхеньян ўртасидаги музокаралар йўли билан, Шимолга қарши халқаро санкциялар ҳақида унутмаган ҳолда, камайтириш устида ишлаш» буйруғини олади.
Либерал лагер вакили, «Тобуро» Демократик партияси собиқ раҳбари Мун Чжэ Ин бугунги кунда Корея Республикаси президенти лавозимига энг мақбул кўрилган номзод бўлиб қолмоқда. Сўнгги ижтимоий сўровлар натижаларига кўра, унга респондентларнинг 40 фоизга яқини овоз беришга тайёр.
Изоҳ (0)