«Соғлом авлод учун» халқаро хайрия фонди «Ўзбекистон темир йўллари» АЖ ва бошқа ташкилотлар кўмагида Ўзбекистоннинг экологик жиҳатдан ноқулай минтақаларига саломатлик поездлари жўнатилиб, ушбу ҳудудларда соғломлаштириш лойиҳалари амалга оширилмоқда, деб хабар берди ЎзА.
«Соғлом авлод учун» халқаро хайрия фондидан маълум қилишларича, Навоий вилоятида ўтказиладиган навбатдаги тадбирни юқори савияда ташкил этишга алоҳида тайёргарлик кўрилган. Саломатлик поезди учун «Ўзбекистон темир йўллари» АЖ томонидан махсус вагонлар тақдим этилган.
Навоий вилоятида 27 апрелга қадар саломатлик кунлари ўтказилади. Бу тадбирларни ташкил этишда пойтахтдан борган шифокорларга маҳаллий мутахассислар, хусусан, фонднинг Навоий вилояти кўчма тиббий-ижтимоий ёрдам бригадаси ходимлари кўмак беради.
Саломатлик поезди Навоий, Конимех, Қора-қата, Мустақиллик, Қизилқудуқ, Бузаубай, Учқудуқ II станцияларига яқин ҳудудларда фаолият юритиши режалаштирилган.
Бундан ташқари, вилоятдаги марказий шифохоналар, болалар шифохоналари, туғруқ мажмуалари ва махсус мактаб-интернатларга инсонпарварлик ёрдами етказилади.
«Дарё»нинг Telegram’даги расмий канали — @toshqindaryo’га аъзо бўлинг!
Изоҳ (0)