«Хурмо тарғибот варақаларидан кўра арзон». Мосулдаги оч аҳолини қутқариш учун самолётлардан мева ёғдириш таклиф қилинди

Мосулнинг ғарбий туманларида қамалдаги очликдан азият чекаётган аҳолига самолётдан хурмо меваларини ёғдириш керак. Бу ҳақда, инсон ҳуқуқлари бўйича Ироқдаги маҳаллий комиссия раҳбари Ғазвон Ҳамид ад-Довудийга асосланиб, «РИА Новости» хабар бермоқда.

«Қамалда қолаётган Мосул ғарбидаги гуманитар вазият ақлбовар қилмас даражада паст нуқтада. Қамалда қолаётган туманларга тезроқ самолётдан хурмо ёғдириш лозим», — деди ад-Довудий.

Амалдорнинг қайд этишича, «давлатга миллионлаб динорга тушаётган» тарғибот варақалари ўрнига Мосулнинг оч аҳолиси учун хурмо ёғдириш фойдалироқдир. «Бу мева жуда арзон ва Ироқда беҳисоб», — деди у.

Унинг сўзларига кўра, Мосулдаги озиқ-овқат захираси ё тез орада тугаб битади, ёки аллақачон тугаб бўлган. Айни вақтда, террорчилар очликдан азият чекмаяпти, барча азоб тинч аҳоли елкасига тушмоқда.

Ироқ ҳарбийларининг Мосулни озод қилиш бўйича АҚШ бошчилигидаги коалиция билан ҳамкорликдаги операцияси 2016 йил октябридан бери давом этмоқда. Февраль ойида шаҳарнинг шарқий қисми ИШИДдан тўла озод қилинган.

«Дарё»нинг Telegram’даги расмий канали — @toshqindaryo’га аъзо бўлинг!