Тереза Мэй Brexit жараёни якунига етганидан сўнг бош вазирликдан кетиши мумкин

Буюк Британия бош вазири Тереза Мэй мамлакатнинг Европа Иттифоқи таркибидан чиқиши жараёни (Brexit) якунига етиши билан, ўз ваколатларини топшириши мумкин. Бу ҳақда, Sunday Mail’га асосланиб, «Газета.ru» хабар бермоқда.

Нашр мухбирларидан бири Ден Хожеснинг маълум қилишича, сиёсатчилардан бири Мэйни «ўтиш даври бош вазири» деб атаган, бошқа бир арбоб эса «Тереза ўзининг парламент муддати якунига етиши билан, кетишга тайёр», деб айтган.

«У мамлакатни Иккинчи жаҳон урушидан кейинги энг даҳшатли инқироздан олиб чиққан инсон сифатида олқишланади, шундан сўнг у сиёсатдан кетиб, эри Филипп билан бахтиёр ҳаёт кечиради», — деди вазирлардан бири.

Мухбир Мэй маҳкамасининг бошқа ходимлари билан ҳам суҳбатлашган. Улардан бири Тереза Мэй «умуммиллий сайловларда қатнашишини, сўнг орадан 18 ой ўтиб, истеъфога чиқишини» айтиб ўтган.

Қайд этишларича, ҳозирги вақтда Мэй Британия тарихидаги энг машҳур бош вазирлардан бири бўлиб турибди, у рейтингларда асосий рақиби — лейбористлар етакчиси Жереми Корбинни ортда қолдирмоқда.

«Дарё»нинг Telegram’даги расмий канали — @toshqindaryo’га аъзо бўлинг!