17 апрель куни Тожикистон пойтахтида Ўзбекистон саноат корхоналари маҳсулотларининг миллий кўргазмаси очилди. Бу ҳақда ЎзА хабар бермоқда.
Бу ҳақда 2016 йил 27—28 декабрь кунлари Душанбе шаҳрида бўлиб ўтган Ўзбекистон билан Тожикистон ўртасида савдо-иқтисодий ҳамкорлик бўйича ҳукуматлараро комиссиянинг тўртинчи мажлиси якунлари бўйича келишувга эришилган эди.
Ўзбекистоннинг иқтисодий ва экспорт салоҳияти, инвестиция сиёсати билан Тожикистон ишбилармон доира вакилларини таништириш, Ўзбекистон халқининг бой маданий-тарихий мероси ва туризм соҳаси ривожи тўғрисида хабардор қилиш мақсадида ушбу кўргазмага пухта ҳозирлик кўрилди.
Вазирлар Маҳкамасининг 2017 йил 7 апрелдаги фармойишига мувофиқ, кўргазмани ташкил этиш учун маҳсулотлар, экспозиция материаллари ва зарур жиҳозлар етказиб берилди. Кўргазмада 160 дан зиёд компания Ўзбекистонда ишлаб чиқарилаётган 1 минг 500 турдаги маҳсулотни намойиш этмоқда.
Душанбе шаҳридаги «Пойтахт – 90» савдо маркази ҳудудидаги 2 минг квадрат метр майдонда электротехника, кабел, фармацевтика, сантехника, тўқимачилик, чарм маҳсулотлари, ўқув-лаборатория ускуналари, қурилиш материаллари, озиқ-овқат маҳсулотлари, чинни буюм ва идишлар, парфюмерия ва бошқа маҳсулотлар намойиш этилмоқда.
1000 квадрат метр очиқ майдонда қишлоқ хўжалиги техникаси ва турли осма ускуналар, енгил ва юк автомобиллари, йўловчи автобуслари тақдим этилган.
Тадбир доирасида ташкил қилинадиган бизнес-форум ва семинарларда Ўзбекистон ва Тожикистон ишбилармон доираларининг 500 дан ортиқ вакили қатнашиб, ўзаро манфаатли ҳамкорликни кенгайтириш масалаларини муҳокама этади.
«Дарё»нинг Telegram’даги расмий канали — @toshqindaryo’га аъзо бўлинг!
Изоҳ (0)