Пойтахтнинг бош архитектори Саъдулла Мухторхўжаевнинг маълум қилишича, шаҳар ҳокимининг бу ҳақдаги қарори лойиҳаси муҳокама учун интернетга жойлаштирилган.
Кенг кўламли «Замонавий маҳалла» дастурининг бир қисми ҳисобланган лойиҳа 2020 йил сўнгига қадар босқичма-босқич амалга оширилади. Автотураргоҳлар тадбиркорларнинг шахсий маблағлари ва банк кредитлари ҳисобидан бунёд этилади.
Кўп қаватли автотураргоҳлар қуришга имкон бўлмаган жойларда очиқ автотураргоҳлар қурилади. Кўп қаватлилардан фарқли равишда, уларнинг бепул бўлиши таклиф этилмоқда.
Архитекторнинг таъкидлашича, бугунги кунда шаҳардаги барча металл гаражлар майдони 25,63 гектар бўлиб, 8470 машина сиғимига тенг. 27,4 минг автомобилни сиғдирувчи яна 69,16 гектар майдон гараж хўжаликларига тегишли.
Аксарият ҳолларда гаражлар жойлашган ҳудудлар ташландиқ кўринишга эга бўлиб, ёнғин ва жамоат хавфсизлиги талабларига жавоб бермайди, улар атрофида мунтазам равишда чиқиндилар тўпланади. Жуда кўп ҳолларда гаражлар тартибсиз ўрнатилган, кўпчилиги эса мақсадли фойдаланилмайди, айримларида эса одамлар истиқомат қилади.
Тошкент шаҳар ИИББ маълумотларига кўра, жорий йил 1 март ҳолатига кўра пойтахтда 420,1 мингдан зиёд автомототранспорт воситаси ҳисобга олинган (2015 йил бошида 353,9 минг ёки қарийб 20 фоиз кам). Шахсий автомобиллар турар жой мавзеларининг катта қисмини эгаллаб, болалар ўйингоҳлари ва аҳоли дам олиши учун жой тобора қисқариб бормоқда.
Тошкент архитектура ва қурилиш бош бошқармаси турар жой мавзелари учун бир қанча автотураргоҳ лойиҳаларини тайёрлаган. Уларга кўра икки қаватлиларида 80, уч қаватлиларида 144 ҳамда олти қаватлиларида 480 ва 532 автомобиль жойлашади.
Мавжуд очиқ автотураргоҳлар ўрнида ҳам кўп қаватлилари бунёд этилади. Уларнинг биринчи қаватида савдо ва сервис объектлари ташкил этилиши мумкин.
Саъдулла Мухторхўжаевнинг қўшимча қилишича, замонавий турар жой ва нотурар бинолар лойиҳаларида автомобиллар сақлаш учун улар ҳудудида ер ости тураргоҳлар қуриш кўзда тутилган.
«Дарё»нинг Telegram’даги расмий канали — @toshqindaryo’га аъзо бўлинг!
Изоҳ (0)