Ўзбекистоннинг барча ҳудудлари каби Самарқанд вилоятида ҳам кичик бизнес ва хусусий тадбиркорликни жадал ривожлантириш, тадбиркорларнинг эркин фаолият кўрсатишини қўллаб-қувватлаш юзасидан кенг кўламли чора-тадбирлар амалга оширилмоқда, дея хабар бермоқда ЎзА.
Ўзбекистон Президентининг 12 январдаги «Ургут», «Ғиждувон», «Қўқон» ва «Ҳазорасп» эркин иқтисодий зоналарини ташкил этиш тўғрисида»ги фармони соҳа учун кенг имкониятлар яратмоқда.
Қарорга мувофиқ, «Ургут» эркин иқтисодий зонасининг Ургут туманида «Ургут-1», Нуробод туманида «Ургут-2» ва Пастдарғом туманида «Ургут-3» ҳудудлари ташкил этилди. Ушбу ҳудудлар учун жами 816 гектар ер ажратилиб, уларни зарур муҳандислик-коммуникация инфратузилмаси билан таъминлаш ишлари бошлаб юборилган.
Бугунги кунда енгил саноат, маиший техника, тиббиёт жиҳозлари, фармацевтика, чарм-пойабзал, канселярия моллари, қурилиш материаллари ишлаб чиқариш бўйича лойиҳалар амалга оширилмоқда. 2017—2018 йилларга мўлжалланган 83 лойиҳа тайёрланган, уларнинг 20 таси жорий йилда ишга туширилади.
Умумий қиймати 250 миллион долларни ташкил этувчи ушбу лойиҳалар тижорат банклари кредити ва таъсисчиларнинг маблағлари ҳисобидан молиялаштирилади. Натижада 5,5 минг янги иш ўрни ташкил этилади.
Ўзбекистон Президенти ушбу стратегик ҳудудни ташкил этиш борасидаги ишларни тизимли йўлга қўйиш зарурлигини таъкидлади. Ҳудудга салоҳиятли тадбиркорларни жалб этиш, хориждаги индустриал зоналар фаолиятини ўрганиш ва илғор тажрибаларни амалиётга татбиқ этиш лозим.
Ургут туманида муайян коллежни танлаб, иқтисодий зонада фаолият кўрсатадиган кадрлар тайёрлаш, бундай тажриба «Қўқон», «Ғиждувон», «Ҳазорасп» эркин иқтисодий зоналарига ҳам жорий этиш кераклиги қайд этилди.
Тадбиркорлар билан мулоқотда яратилаётган қулай ишбилармонлик муҳитидан самарали фойдаланиш, маҳсулотлар сифатини ошириш, экспорт фаолиятини ривожлантириш, ташқи бозорларни ўрганиш ва хорижлик ишбилармонлар билан ҳамкорликни кенгайтириш юзасидан тавсиялар берилди.
«Дарё»нинг Telegram’даги расмий канали — @toshqindaryo’га аъзо бўлинг!
Изоҳ (0)