Шавкат Мирзиёев Регистон майдонида Самарқанд вилоятини янада тараққий эттириш бўйича бир қатор истиқболли лойиҳаларни кўздан кечирди. Бу ҳақда ЎзА хабар бермоқда.
Самарқанд шаҳрини ижтимоий-иқтисодий ривожлантириш дастури доирасида 2017—2018 йилларда саноат соҳасида 125 инвестицион лойиҳа амалга оширилади.
Озиқ-овқат ва енгил саноат, чарм-пойабзал, фармацевтика, мебел ва қоғозни қайта ишлаш, электротехника, қурилиш материаллари ишлаб чиқариш, нефть-кимё ва бошқа соҳаларда кўзда тутилаётган лойиҳалар вилоятни изчил ривожлантиришга, аҳолининг ҳаёт сифатини янада яхшилашга қаратилган. Мазкур лойиҳаларнинг ҳаётга татбиқ этилиши 6 минг 300 дан ортиқ кишининг ишли бўлишига хизмат қилади.
Шавкат Мирзиёев Ингичка конида руда қазиб чиқариш ва бойитиш ишларини ривожлантириш лойиҳаси билан танишди.
Мазкур лойиҳалар нафақат вилоят, балки Ўзбекистон тараққиётида муҳим аҳамият касб этиши таъкидланди. Соҳага хорижий инвесторларни фаол жалб этиш, тадбиркорларга қулай муҳит яратиш, уларга турли солиқ ва божхона имтиёзлари бериш, кадрлар салоҳиятини янада ошириш бўйича зарур кўрсатма ва топшириқлар берилди.
Вилоятда «Ўзқурилишматериаллари» компанияси томонидан 163 лойиҳа амалга оширилмоқда.
Нуробод туманида «Навоий металмаш» ва Хитойнинг Gezhouba Group sement Co.LTD корхоналари ҳамкорлигида цемент ишлаб чиқариш режалаштирилган. Йилига 2 миллион тонна маҳсулот ишлаб чиқариш қувватига эга ушбу корхонада 530 янги иш ўрни яратилади.
Пастдарғом туманида қуриладиган «Самарқанд Афросиёб цемент» корхонаси ишга тушгач, 300 киши иш билан таъминланади. Корхонани 2018 йилда ишга тушириш мўлжалланган.
Ўзбекистон Президенти Самарқанд шаҳрининг Фарҳод қўрғони, Иштихон, Қўшработ туманларида гранит ва мармар қазиб олиш, ишлаб чиқариш ҳажмини янада кенгайтириш лойиҳалари билан танишди. Мазкур корхоналарда Италия, Бельгия, Россия ва Хитойнинг замонавий технологияларидан самарали фойдаланиш кўзда тутилган.
Шавкат Мирзиёев «Ургут» эркин иқтисодий зонаси ҳудудида маиший техникалар ишлаб чиқариш бўйича лойиҳаларни кўздан кечирди.
«Ўзелтехсаноат» акциядорлик жамияти ва Ideal Elektro Lyuks масъулияти чекланган жамияти томонидан Туркиянинг Odul компанияси билан ҳамкорликда газ плиталар, электр духовка, кир ювиш машиналари ишлаб чиқариш бўйича амалга оширилаётган лойиҳаларнинг умумий қиймати 7 миллион долларни ташкил этади. Товарларнинг маълум қисми экспорт қилинади.
Coven Elektro масъулияти чекланган жамияти томонидан замонавий чангютгичлар ишлаб чиқарилади. Корхонада йилига 30 минг дона маҳсулот тайёрланади.
Ўзбекистон Президенти мазкур лойиҳалар билан танишар экан, аҳолининг маиший техникалар билан таъминлангани унинг турмуш даражасининг асосий кўрсаткичларидан бири эканини таъкидлади. Маҳсулотларни дунё бозорига олиб чиқиш, «Ўзбекистонда ишлаб чиқарилган» брендини янада кенгроқ оммалаштириш бўйича зарур кўрсатмалар берди.
Миллий банк томонидан фармацевтика соҳасида амалга оширилаётган лойиҳалар тақдимоти ҳам ўтказилди. Optima Sobirjon, Perfect Pharma Group масъулияти чекланган жамиятлари ва Samarkand England eko medical қўшма корхонасида 200 дан ортиқ иш ўрни яратиш мўлжалланган.
Шу ерда вилоятда соғлиқни сақлаш тизимини ривожлантириш, аҳолига маиший хизмат кўрсатиш, спортни янада оммалаштириш борасидаги лойиҳалар тақдимоти ҳам ўтказилди.
«Дарё»нинг Telegram’даги расмий канали — @toshqindaryo’га аъзо бўлинг!
Изоҳ (0)