Тошкент шаҳридаги чорраҳаларда ўрнатилган кузатув камералари томонидан қайд этилган қоидабузарликлар ҳақида Ягона интерактив давлат хизматлари портали («My.gov.uz»)да маълумот олиш мумкин бўлади. Бу ҳақда Тошкент шаҳар ИИББда бўлиб ўтган брифингда маълум қилинди.
Яқин кунларда Ягона интерактив давлат хизматлари портали янги талқинда ишлай бошлайди. Унда кузатув камералари томонидан чорраҳаларда қайд этилган қоидабузарликлар ҳақида маълумот берувчи бўлим ишга тушади.
«My.gov.uz»да ҳайдовчи ўз шахсий кабинетига автомобилининг техник паспорти рақамини ва автомобилнинг давлат рақамини киритиш орқали қоидабузрлик мавжуд ёки йўқлигини билиши мумкин бўлади.
Агар ҳайдовчи қоидани бузса, қоидабузарлик содир этилган чорраҳадаги камера орқали қайд этилган жарима тўғридан-тўғри Ягона порталга келиб тушади.
Ҳайдовчининг шахсий кабинетида қоидабзарлик қайси чорраҳада, қачон содир этилганлиги, қоидабузарликнинг тури, жарима миқдори ва жаримани тўлаш учун қанча вақт қолганлиги ҳақида маълумот кўрсатилади.
Ҳайдовчи шахсий кабинетда SMS-хабарнома хизматини ёқиши мумкин. SMS-хабарнома хизмат ёқилгандан сўнг, агар ҳайдовчи камера ўрнатилган чорраҳада қоидабузарлик содир этса, бу ҳақда ҳайдовчининг шахсий кабинетига бириктирилган мобил телефон рақамига SMS-хабар келади.
Ягона порталда хизмат ишга туширилганидан сўнг қоидабузарликлар ҳақидаги маълумотлар биринчи босқичда қоидабузарликларни акс эттирувчи фотосуратларсиз берилади. Кейинги босқичда эса қоидабузарликлар ҳақидаги маълумотлар фотосуратлар билан бирга тақдим этилади.
Кейинчалик қоидабузарликлар учун тўловларни портал орқали амалга ошириш имконияти ҳам яратилади. Ҳозирги кунда эса чорраҳалардаги камералар томонидан қайд этилган қоидабузарликларни Payme ва Mbank тўлов тизимлари орқали тўлаш имконияти бор.
Хизмат апрель ойининг охиригача ишга тушиши кутилмоқда.
«Дарё»нинг Telegram’даги расмий канали — @toshqindaryo’га аъзо бўлинг!
Изоҳ (0)