Ўзбекистон ва Россия ўртасидаги ҳамкорликни янада ривожлантиришга қаратилган элликдан ортиқ ҳужжат имзоланди

Ўзбекистон Президенти Шавкат Мирзиёевнинг Россияга давлат ташрифи якунлари бўйича қатор ҳужжатлар имзоланди. Бу ҳақда ЎзА хабар бермоқда.

«Олий даражадаги музокараларда ўзаро ҳамкорликни янада ривожлантиришнинг муҳим йўналишлари белгилаб олинди. Ўзбекистон Президентининг тарихий аҳамият касб этган ушбу давлат ташрифи Ўзбекистон ва Россия ўртасидаги стратегик шериклик ва иттифоқчилик муносабатларини янги босқичга олиб чиқишига хизмат қилади», — дейилади ЎзА ахборотида.

Ўзбекистон ва Россия президентлари Шавкат Мирзиёев ва Владимир Путин Қўшма баёнотни имзолади. Ўзбекистон—Россия муносабатларини изчил ривожлантириш, ўзаро ҳамкорликни сифат жиҳатидан янги босқичга кўтаришга қаратилган ҳукуматлараро, идоралараро битимлар ва бошқа қатор ҳужжатлар имзоланди.

Ўзбекистон ва Россия президентлари олий даражадаги учрашув ва музокаралар якунлари бўйича оммавий ахборот воситалари вакиллари учун баёнот берди. Шавкат Мирзиёев ва Владимир Путин музокаралар очиқлик, ўзаро ишонч ва амалий руҳда ўтганини таъкидлади.

Ташриф асносида эришилган 50 дан ортиқ келишувлар, имзоланган ҳужжатлар Ўзбекистон ва Россия тараққиётига, икки мамлакат халқларининг фаровонлигини янада юксалтиришга, Ўзбекистон ва Россия ўртасида ҳамкорликни янги босқичга кўтаришга хизмат қилиши қайд этилди.

«Дарё»нинг Telegram’даги расмий канали — @toshqindaryo’га аъзо бўлинг!