Меҳнат вазири Азиз Абдуҳакимов раҳбарлигидаги Ўзбекистон делегацияси 30 март куни Москвадаги Кўп функцияли муҳожирлик маркази (КММ)га ташриф буюрди, деб ёзади «Газета.uz». Ташриф мақсади марказ фаолияти билан танишиш ва қатор масалаларни, шу жумладан, Ўзбекистон фуқароларини КММ хизматлари ҳақида хабардор қилишни муҳокама этишдан иборат бўлди.
КММ бош директори Николай Федосеев патент олиш жараёни, шунингдек, ҳукумат органлари, ҳуқуқ-тартибот органлари ва хорижий фуқароларга хизматлар кўрсатувчи ташкилотлар билан ҳамкорлик ҳақида гапириб берди.
Азиз Абдуҳакимов КММни кўздан кечириш чоғида патент олаётган ўзбекистонлик меҳнат муҳожирлари билан мулоқот қилди, уларнинг марказда тақдим этилаётган хизматлар сифати ҳақидаги фикрини ўрганди. «Бизнинг фуқароларимиз Россия ҳудудида яшаётган вақтида Россия қонунчилигига риоя қилишидан манфаатдормиз, солиқларни тўлаб Россия иқтисодиёти ривожланишига ўз ҳиссасини қўшар экан, улар тўлиқ ҳимояланиши керак», — деди Абдуҳакимов.
Николай Федосеев сўзларига кўра, 2016 йилда жами патент олганларнинг қарийб 45 фоизини Ўзбекистон фуқаролари ташкил этган.
Томонлар меҳнат миграцияси соҳасидаги ҳамкорликни кенгайтиришга келишиб олди. Хусусан, Ўзбекистон аэропортлари ва вокзалларида КММда патентларни расмийлаштириш ҳақида брошюра ва буклетлар тарқатилиши режалаштирилган.
Изоҳ (0)