Тошкентдаги барча маҳаллаларда кутубхоналар ва маиший хизмат шохобчалари ташкил этилади

Тошкентда шаҳарнинг барча 505 та маҳалласини қамраб олувчи «Замонавий маҳалла» лойиҳасини амалга ошириш ишлари бошланди. Тошкент шаҳар ҳокими Раҳмонбек Усмонов бу ҳақдаги қарорни 31 март куни имзолаган. Бу ҳақда «Газета.uz» хабар бермоқда.

Янги маҳалла марказлари Ўзбекистон Президенти Шавкат Мирзиёев 25 март куни ташриф буюрган Тошкентнинг Юнусобод туманидаги Увайсий маҳалласи намунасида бунёд этилади.

13 кўп қаватли уйдан иборат ва 5400 киши истиқомат қиладиган ушбу маҳаллада маҳалла фуқаролар йиғини раҳбарияти учун иншоот, чойхона, новвойхона, гўзаллик салони, дўконлар, спорт ва болалар майдончалари, фаввора, 2000 та китоби ва интернетга кириш имкони бўлган кутубхона қурилган. Видеокузатув тизими йўлга қўйилган, йўллар ёритилган, ўриндиқлар ўрнатилган.

Маҳалла аҳли билан мулоқот қиларкан, Президент бу каби маҳалал марказларини Ўзбекистоннинг барча ҳудудларида ташкил этиш лозимлигини таъкидлаган эди.

Тошкент шаҳар ҳокими ўринбосари ва Хотин-қизлар қўмитаси раиси Фарида Абдураҳимованинг таъкидлашича, «Замонавий маҳалла» лойиҳасида барча манфаатдор тадбиркорлар қатнашиши мумкин. Айни вақтда, лойиҳада «мажбурий иштирок этиш» ҳақида гап йўқ, ҳукумат ташаббус одамларнинг ўзидан чиқишидан манфаатдор. Тадбиркорлар учун имтиёзли кредитлар ажратилади.

Лойиҳага кўра, маҳалла марказларида ҳордиқ чиқариш учун ўриндиқлари бор ободонлаштирилган ҳудудлар, болалар ва спорт билан шуғулланиш учун майдончалар ташкил этилади. Бундан ташқари, гўзаллик салонлари, новвойхоналар, пойабзал ва маиший техникани таъмирлаш бўйича устахоналар, кичик ателелар, кутубхона ва бошқа объектлар барпо этилади.

«Маҳалла» фондининг Тошкент шаҳри бўйича бошқармаси бошлиғи Аҳрор Ғуломовнинг таъкидлашича, янги маҳалла марказларини бунёд этиш бўйича ишлар 1 ноябрга қадар якунланиши режалаштирилган. Унинг сўзларига кўра, лойиҳа нафақат одамларнинг яшаш шароитларини яхшилайди, балки ўз ишини бошламоқчи бўлганлар учун ҳам янги имкониятлар тақдим этади. Янги иш ўринларининг пайдо бўлиши натижасида кўплаб одамлар уйига яқин жойда ишлаш имконига эга бўлади. Лойиҳа натижасида 25—30 минг киши иш билан таъминланиши кутилмоқда.

«Дарё»нинг Telegram’даги расмий канали — @toshqindaryo’га аъзо бўлинг!