Президент Шавкат Мирзиёев 29 март куни «Фуқаролар ҳуқуқлари ва эркинлигини ишончли муҳофаза қилиш кафолатини таъминлаш бўйича қўшимча чора-тадбирлар қабул қилиниши муносабати билан Ўзбекистон Республикасининг айрим қонунчилик ҳужжатларига ўзгартиш ва қўшимчалар киритиш тўғрисида»ги Қонунни имзолади. Бу ҳақда «Газета.uz» хабар бермоқда.
Ҳужжат 17 март куни Олий Мажлис Қонунчилик палатаси томонидан қабул қилиниб, 28 март куни Сенат томонидан тасдиқланган эди.
Қонун Жиноий, Жиноий-процессуал, Фуқаролик процессуал, Жиноий-ижроий кодекслар, «Судлар тўғрисида»ги ва «Прокуратура тўғрисида»ги қонунларга ўзгартиш ва қўшимчалар киритишни кўзда тутади.
Хусусан, жиноий жазо ҳибсга олиш кўринишида енгиллаштирилади. Шу билан бир вақтда, жиноий жазолар тизимига анча енгил, озодликдан маҳрум қилиш билан боғлиқ бўлмаган жазо – «мажбурий жамоат ишлари» киритилмоқда.
Жиноят содир этганликда гумонланаётган шахсларга нисбатан ҳибсга олиш муддатлари 72 соатдан 48 соатга, дастлабки тергов 12 ойдан 7 ойгача қисқартирилди. Қўриқчилар назорати остида ҳамда уй қамоғида ушлаб туриш чоралари ҳам энг кам муддатгача қисқартирилди.
Бундан ташқари, почта ва телеграф жўнатмаларини қўлга олиш ҳамда жасадни суд-медицина экспертизаси учун кавлаб олиш бўйича санкция бериш ҳуқуқи прокуратурадан судларга ўтказилиши белгиланди.
Фуқаролик ишлари бўйича суд қарорларини назорат тартибида қайта кўриб чиқиш муддатлари уч йилдан бир йилгача қисқартирилди.
Қонунда белгиланган барча ўзгартиришлар 2017 йил 1 апрелидан кучга киради.
Қонуннинг тўлиқ матни билан қуйидаги ҳавола орқали танишиш мумкин.
Изоҳ (0)