АҚШ президенти Дональд Трамп Барак Обамани гўёки Нью-Йоркдаги Trump Tower осмонўпар биносини яширинча тинглаганликда асоссиз айблагани учун ундан кечирим сўраши керак. Бундай фикрни Конгресснинг Вакиллар палатасидаги демократлар етакчиси Нэнси Пелоси билдирди, деб ёзади «ТАСС».
«Собиқ президент Обама бундай қила олмасди, Трампда ҳам буни тасдиқловчи ҳеч қандай далиллар йўқ», — деди Пелоси телефон суҳбатларини тинглашга рухсат берилишини назарда тутиб.
У, шунингдек, Трамп Оқ уйнинг собиқ раҳбаридан узр сўраши кераклигини таъкидлади. «У бундай қилиши керак эмасди, энди эса у нафақат Обама, балки бутун Америка халқидан кечирим сўраши керак», — деди у.
Трамп 4 март куни ўз Twitter’ида собиқ президент Обаманинг маъмурияти ўтган йил ноябрида республикачининг сайловдаги ғалабасидан бир неча кун олдин Trump Tower биносида телефон суҳбатларини яширинча тинглагани ҳақидаги даъво билан чиқиш қилган эди. Эртаси куни Оқ уй АҚШ Конгрессидан бу борада текширув олиб боришни талаб қилди. Кейинроқ ФҚБ директори Жеймс Коми унинг муассасаси ва АҚШ адлия вазирлигида яширинча тинглаш ҳақидаги даъволарни тасдиқловчи маълумотлар йўқлигини айтди.
Изоҳ (0)