Ўзбекистон Президенти Шавкат Мирзиёев Вазирлар Маҳкамаси ҳузуридаги Янгидан қурилаётган ва реконструкция қилинаётган ишлаб чиқариш қувватлари лойиҳаларининг техник-иқтисодий асосланишини, техника ва технологияларни эксперт баҳолаш агентлигини тугатиш тўғрисидаги қарорни имзолади. Бу ҳақда «Газета.uz» давлат раҳбари матбуот хизматига таяниб хабар берди.
Импорт шартномаларини инвестиция лойиҳаларини, шу жумладан, тайёр ҳолда топшириладиган лойиҳаларни амалга ошириш доирасида сотиб олинадиган ускуналар, техника ва технологияларнинг нарх кўрсаткичлари бўйича экспертизадан ўтказиш учун ваколатли орган этиб «Ўзбекэкспертиза» АЖ белгиланди.
Ҳукумат «Ўзбекэкспертиза» фаолиятини такомиллаштириш бўйича чора-тадбирларни ишлаб чиқиши, шу жумладан, унинг фаолиятига экспорт-импорт операцияларини маркетинг жиҳатидан таҳлил қилиш соҳасидаги тажрибали ва малакали мутахассисларни жалб этиши керак.
Соҳа бўйича вазирлик ва идоралар — инвестиция лойиҳалари ташаббускорларига тендер ва лойиҳадан олдинги ҳужжатларни экспертизадан ўтказиш бўйича ўз кенгашларини тузиш топширилди.
Қарор лойиҳадан олдинги ҳужжатларни тайёрлаш сифатига зарар етказмаган ҳолда, инвестиция лойиҳаларини ишлаб чиқиш механизмини такомиллаштириш ва уларни тайёрлаш жараёнини тезлаштириш, шунингдек, уларни экспертизадан ўтказиш тартибини соддалаштириш учун илғор хорижий тажрибага асосланган қулай шароитлар яратиш мақсадида қабул қилинган.
Изоҳ (0)