Ўзбекистоннинг минтақавий позициялари мустаҳкамланиши Марказий Осиё минтақасида иқтисодий гегемон алмашишига олиб келиши, шунингдек, инвестициялар ва бозорлар учун рақобатни кучайтириши мумкин. Бу ҳақда Қозоғистон миллий иқтисодиёт вазири Тимур Сулаймонов CFO Summit 2017 да айтиб ўтди, деб ёзади «Vласть».
Қозоғистонга хавф соладиган ташқи рисклар ҳақида гапирар экан, вазир «уйғонаётган ва либерализациялашаётган Ўзбекистон»га эътибор қаратди. У ушбу мамлакатни ўз олдига катта мақсадларни қўйган ва, эҳтимол, шаклланаётган сиёсий йўналиш туфайли ҳозирча аниқлаш қийин бўлган катта имкониятларга эга бўлган мамлакат деб атади.
«Бироқ шунга қарамай, бу (Ўзбекистоннинг мустаҳкамланиши) биз учун аниқ чақириқ бўлади. Биз кўникиб қолган тушунча бўйича ва холисона айтганда ҳам, Қозоғистон — минтақадаги гегемон. Энди эса у ўзгариши мумкин, мен иқтисодий гегемонни назарда тутяпман. Инвестициялар учун кураш, бозорлар учун кураш кучайиши мумкин. Бу ҳам биз ўрта муддатли даврда ҳал қилишимиз керак бўлган чақириқлардан бири», — деди у.
Изоҳ (0)