Ўзбекистонда райдшеринг сервиси ишга туширилди
Тошкент шаҳридаги Инҳа университети талабалари Great Gate компанияси билан ҳамкорликда автомобилда биргаликдаги саёҳат учун дастур ишлаб чиқди, дея хабар бермоқда университет расмий сайти. PoPuti.uz дастурини смартфонга юклаб олиш мумкин. Сервис пул ҳамда вақтни тежаган ҳолда бутун Ўзбекистон бўйлаб ҳаракатланиш имконини беради.
PoPuti.uz лойиҳаси райдшеринг сервиси ҳисобланади. Райдшеринг – онлайн-сервис ёрдамида ҳамроҳ йўловчи излаган ҳолда хусусий автомобилдан фойдаланишдир. Бунда ёнилғига кетадиган харажат автомобиль эгаси ҳамда йўловчи ўртасида тенг тақсимланади.
Инновациялар ва саноат кооперацияси марказида ишлайдиган IUT талабалари, бир неча ой давомида Android ва iOS платформасида ишлайдиган мобил дастурлар ҳамда вебсайтни ишлаб чиқди.
Сардор Исломов, IUT нинг 2-босқич талабаси: «Биз PoPuti.uz мобил дастурлар ҳамда вебсайтини фойдаланувчилар учун максимал даражада қулай қилиб яратишга ҳаракат қилдик. Биз мазкур лойиҳамиз устида ишлашда давом этамиз. Ўйлайманки, мазкур лойиҳа транспорт-логистика соҳасининг ривожланишига ўз ҳиссасини қўшади».
«Мазкур сервис ёрдамида инсонлар осонгина ўзларига ҳамроҳ йўловчи топишлари мумкин. Тизимда шунингдек, чат бўлиб, унинг ёрдамида автомобиль эгаси ҳамда йўловчи сафар вақтини ёки йўналишини муҳокама қилиши мумкин. Шунингдек, лойиҳа қатнашчилари бир-бирларини баҳолаши мумкин», — қўшимча қилди Исломов.
