16 март, пайшанба куни Бухоро вилояти Пешку тумани халқ депутатлари Кенгашининг навбатдан ташқари сессияси бўлиб ўтди, дея хабар беради Бухоро вилояти ҳокимлиги ахборот хизмати.
Сессияда Бухоро вилояти ҳокими Ўктам Барноев сўзга чиқиб, Пешку туманида ҳудудни ижтимоий-иқтисодий ривожлантириш, одамларга муносиб турмуш шароитларини яратиш, улар билан яқиндан мулоқот қилиш ва муаммоларини ҳал этиш бўйича ишлар талаб даражасида эмаслиги танқид қилинганини таъкидлаб ўтди.
Йиғилишда, пахта, қишлоқ хўжалиги озиқ-овқат экинларини етиштиришдаги паст кўрсаткичлар, аҳолининг коммунал тўловлардан қарздорлиги, мактаб ва мактабгача таълим муассасаларининг таъмирталаблиги, ички йўлларнинг яроқсиз ҳолатга келиб қолганлиги маърузада танқидий таҳлил этилди.
Вилоят ҳокими қайд этилган мавжуд муаммоларни бартараф этиш ҳамда туманни қолоқликдан чиқариш борасида алоҳида комплекс дастур шакллантириш лозимлиги хусусида тўхталиб, вилоятнинг барча раҳбарларига ўз тизимлари бўйича ушбу дастурга киритиладиган лойиҳалар хусусида аниқ таклифлар тақдим этиш бўйича топшириқ берди.
Сессияда ташкилий масала кўрилди. Пешку туман ҳокими Шавкат Мавлонов ўз аризасига биноан вазифасидан озод қилинди. Шу кунгача вилоят қишлоқ ва сув хўжалиги бошқармаси бошлиғи вазифасида фаолият юритиб келаётган Амрилло Назаров туман ҳокими этиб сайланди.
Амрилло Назаров (1966 йилда туғилган) 1991 йил Андижон пахтачилик институтини тамомлаган, 2009 йили Ўзбекистон Республикаси Президенти ҳузуридаги Давлат ва жамият қурилиши академияси қошидаги Олий бизнес мактабини тугатган.
Меҳнат фаолиятини 1997 йили Бухоро вилояти ҳокимининг биринчи ўринбосари котибиятида бошлаган бўлиб, 1999—2004 йилларда Ромитан туманида қишлоқ ва сув хўжалиги бошқармаси, Бухоро вилояти қишлоқ ва сув хўжалиги бошқармаси пахтачиликни, техника экинларини ривожлантириш ва навларни жойлаштириш бўлими бошлиғи, 2004—2009 йилларда Бухоро вилояти ғўза уруғчилиги бирлашмаси раиси, Ғўза уруғчилиги республика маркази бошлиғининг ўринбосари лавозимларида меҳнат қилган.
2012—2016 йилларда Бухоро вилоят ғўза уруғчилиги бирлашмаси раиси сифатида ишлаган бўлса, 2009—2012 йилларда ва 2017 йилдан бери Бухоро вилоят қишлоқ ва сув хўжалиги бошқармаси бошлиғи лавозимида фаолият кўрсатиб келаётган эди.
Оилали, икки фарзанди бор.
«Дарё»нинг Telegram’даги расмий канали — @toshqindaryo’га аъзо бўлинг!
Изоҳ (0)