Дипломатик муносабатлар ўрнатилганига 25 йил тўлган Ўзбекистон ва Бельгия ўртасида маданият, фан, таълим, соғлиқни сақлаш, спорт ва туризм соҳаларида ҳамкорлик мустаҳкамланиб бормоқда. Бу ҳақда «Жаҳон» ахборот агентлиги маълум қилди.
Тошкент ва Кортрейк, Льеж ва Самарқанд шаҳарлари ўртасида биродарлик алоқалари ўрнатилган. Мазкур шаҳарлар вакиллари мунтазам равишда борди-келдини йўлга қўйган, икки халқни яқинлаштиришга хизмат қилувчи қўшма маданий тадбирлар ўтказилмоқда.
Ўзбекистондаги етакчи ўқув юртлари француз тили ўқитувчилари таълим лойиҳалари доирасида ҳар йили Лювен университетида малака ошириб келмоқда. Ўзбекистон Президенти ҳузуридаги давлат бошқаруви академияси Маъмурий фанлар халқаро институти билан муваффақиятли ҳамкорлик қилиб келмоқда.
Ўзбекистон Соғлиқни сақлаш вазирлиги ва Бельгиянинг Сент-Люк университети клиникаси ҳамкорликни ривожлантириш масалаларини кўриб чиқмоқда.
Икки давлат ўртасидаги муносабатлар ривожланишига 12 та ҳужжатдан иборат шартномавий-ҳуқуқий асос бўлиб хизмат қилмоқда. Улардан 10 таси давлатлараро ва ҳукуматлараро даражага эга.
Эслатиб ўтамиз, Ўзбекистон ва Бельгия ўртасида дипломатик муносабатлар ўрнатилганининг 25 йиллиги муносабати билан Бельгия қироли Филипп ва Ўзбекистон Президенти Шавкат Мирзиёев бир-бирини табриклади.
Изоҳ (0)