Тошкент шаҳрида Ўзбекистон Республикасида болалар меҳнати масалалари бўйича Мувофиқлаштирувчи кенгаш йиғилиши ўтказилди. Бу ҳақда Касаба уюшмалари Федерацияси матбуот хизмати маълум қилди.
Унда 2016 йилда миллий ва халқаро меҳнат стандартлари бўйича аҳоли хабардорлигини ошириш кампанияси таҳлили натижалари ҳамда 2017 йилда амалга ошириладиган вазифалар кўриб чиқилди.
2016 йилда Мувофиқлаштирувчи кенгаш томонидан «Миллий ва халқаро меҳнат стандартлари бўйича республика аҳолиси хабардорлигини оширишга йўналтирилган ахборот-тушунтириш кампанияси Концепцияси» ишлаб чиқилди.
Мазкур Концепция асосида қишлоқ хўжалигидаги мавсумий ишларга эркин ёллаш, шунингдек, болалар меҳнати ва мажбурий меҳнатга йўл қўйилмаслиги тўғрисида баннер, постер ва флаерлар тайёрланиб, чоп этилди ҳамда бутун республика бўйича аҳоли гавжум ва кўринарли жойларга жойлаштирилди.
Миллий телерадиокомпания телеканаллари орқали Касаба уюшмалари Федерацияси, Mehnat вазирлиги ва Савдо-саноат палатаси тизимидаги қайта алоқа механизми ва «Ишонч телефонлари» акс эттирилган видеоролик намойиш этиб борилмоқда. Мобил операторлар орқали эса фуқароларнинг меҳнат ҳуқуқларига риоя этилмаган ҳолатларда мурожаат этиш мумкин бўлган телефон рақамлари тўғрисидаги маълумотлар SMS хабар шаклида аҳолига етказилди.
Йиғилишда аҳолининг меҳнат ҳуқуқлари бўйича хабардорлигини ошириш борасидаги ишларни янада кенгайтириш мақсадида ахборот-тушунтириш кампаниясини янада такомиллаштириш тўғрисида қарор қабул қилинди.
Мувофиқлаштирувчи кенгаш аъзолари Халқаро меҳнат ташкилоти ва Жаҳон банки билан тизимли ишларни давом эттиришни мақсадга мувофиқ, деб топди. Шу мақсадда Мувофиқлаштирувчи кенгашнинг 2017- йил учун комплекс чора-тадбирлар режаси қабул қилинди.
ХМТ экспертлар Қўмитасининг Халқаро меҳнат конференциясининг 106-сессиясидаги маърузасида Ўзбекистонда ХМТ Конвенциялари бажарилиши бўйича қатор ижобий натижалар қайд этилгани, хусусан, ҳукумат ва ижтимоий шериклар томонидан ўз зиммаларига олинган мажбуриятларнинг амалга оширилиши пахта терими даврида халқаро меҳнат стандартларига риоя этилишига ижобий таъсир кўрсатгани алоҳида таъкидланган.
Экспертлар қўмитаси Ўзбекистондаги ижтимоий шериклардан миллий мониторинг, таълим муассасаларидаги давоматни мустаҳкамлаш, меҳнат қонунчилигига риоя этмаслик ҳолатларининг олдини олиш, шунингдек, ушбу масалалар бўйича жамоатчиликнинг хабардорлигини ошириш борасидаги ишларни давом эттиришни сўради.
Изоҳ (0)