Истанбулда қулаган вертолёт ичида бўлганларнинг бари — етти киши ҳалок бўлди

Истанбулда қулаган вертолёт бортида бўлган барча йўловчилар ва экипаж аъзолари ҳалок бўлди. Бу ҳақда, «Коммерсантъ» хабарига кўра, Истанбул мери Қодир Тўпбош маълум қилган.

Аввалроқ вертолёт ҳалокати оқибатида беш йўловчи ҳалок бўлгани, учувчилар эса шифохонага етказилгани ҳақида хабар берилган эди. NTV’нинг аниқлик киритишича, шаҳар раҳбари учувчилар даволашга юборилгани ҳақидаги хабарларни рад этган.

Аввал хабар берилганидек, вертолёт ҳалокати оқибатида Россиянинг тўрт фуқароси — ВитрА компанияси ходимлари ҳалок бўлган. Ҳаво кемаси Билежекдаги ишчи учрашув ўтказиладиган манзилга йўл олган эди.

Вертолёт бортида икки учувчи, Туркиянинг Eczacibasi холдинги Россия бўлинмаси раҳбари Салим Ўзен, шунингдек, унинг меҳмонлари — россиялик ишбилармонлар бўлган.

Тергов маълумотларига кўра, ҳавога кўтарилганидан сўнг вертолёт қуюқ туман ичида қолган ва маълум вақтдан сўнг телеминорага урилган. Зарб натижасида ҳаво кемаси бўлакларга бўлиниб, сўнг ёниб кетган.

«Дарё»нинг Telegram’даги расмий канали — @toshqindaryo’га аъзо бўлинг!