Европа Чемпионлар лигасининг нимчорак финалидан жой олган «Барселона» —«ПСЖ» учрашувини германиялик Дениз Айтекин бошқариб борганди. «Sports.ru»нинг Marca нашрига асосланиб хабар беришича, келиб чиқиши туркиялик бўлган рефери Чемпионлар лигасининг жорий мавсумдаги ўйинларига қайта таклиф қилинмайди.
Айтекин «ПСЖ» зарарига ишлаган бир қатор хатоларга йўл қўйган бўлиши мумкин. Жумладан, у Ди Марияга нисбатан ишлатилган қўполлик учун «Барселона» дарвозасига пенальти тайин қилмагани, аксинча, қўполликдек кўринмаган вазиятларда парижликлар дарвозаси томон 11 метрлик жарима зарбалари белгилагани шубҳа остига олинган.
УЕФА ҳакамлар қўмитасини италиялик машҳур Пьерлуижи Коллина бошқариб боради. Унинг қўл остидаги комиссия вазиятни атрофлича ўрганиб чиқиб, Дениз Айтекинни Чемпионлар лигасининг шу мавсуми ҳисобидан ўйинларга қайта тайлиф қилмаслиги катта эҳтимол.
Маълумот учун, «Барселона» ўз майдонида Париж клуби устидан 6:1 ҳисобида зафар қучиб, чорак финал чиптасини фантастик тарзда қўлга киритди. Учрашувдан кейин «ПСЖ» дарвозасига белгиланган икки пенальти кенг муҳокамаларга сабаб бўлди.