77 кишини ўлдирган Брейвик қамоқдаги «ноинсоний муносабат»дан шикоят қилган эди. У апелляция судида ютқазди

Норвегиядаги Боргартинг апелляция суди қамоқда маҳбус Андерс Брейвикнинг ҳуқуқлари бузилмаган, деб қарор чиқарди. Шундай қилиб, Meduza’нинг ёзишича, 2016 йилги қарор бекор қилинган.

Суд қарорига мувофиқ, Брейвик қамоқда, унинг даъвосида қайд этилганига қарши ўлароқ, «қийноқларга ёки ноинсоний ёхуд таҳқирловчи муносабат»га тортилмаган. Бошқа маҳбуслар билан мулоқот қилиш тақиқини эса суд асосли деб ҳисоблаган — Брейвик қилган ишига ҳали пушаймон бўлмаган ва жамият учун хавфли.

Брейвикнинг адвокатлари апелляция судининг мазкур қарори устида Олий судга шикоят қилишни режалаштирмоқда.

2016 йилнинг апрелида Осло суди Брейвикнинг Норвегия ҳукуматига қарши даъвосини қаноатлантирган эди. Суд маҳкама харажатларини қоплаш учун Брейвикка компенсация пули тўлаш мажбуриятини юклаган эди.

Брейвик 2011 йил ёзида 77 кишини ўлдирганликда айбланиб, озодликдан маҳрум этилган. Ўшанда у дастлаб Ослонинг ҳукумат мавзесида бомба портлатган, сўнг Утойя оролидаги ёшлар лагерида 69 кишини отиб ташлаган. Бунинг учун Брейвик Норвегия қонунларида кўзда тутилган энг оғир жазо — 21 йиллик қамоққа ҳукм қилинган.

Брейвик жазони бир кишига мўлжалланган уч хонали камерада ўтамоқда.

«Дарё»нинг Telegram’даги расмий канали — @toshqindaryo’га аъзо бўлинг!