Сальвадордаги ягона бегемот номаълум кишилар томонидан қилинган ҳужум натижасида олган жароҳати туфайли вафот этди. У мамлакат пойтахти Сан-Сальвадор шаҳридаги ҳайвонот боғида сақланаётган эди. Бу ҳақда мамлакат маданият вазирлигининг Facebook’даги саҳифасида хабар берилди.
«Маданият вазирлиги афсус билан хабар қиладики, 26 февраль, якшанба куни кечаси, бегемот Густавито вафот этди. Ўлим оғир жароҳатлар туфайли ҳайвон саломатлигининг ёмонлашиши натижасида юз берди. Ҳайвон жароҳатни қўрқоқларча қилинган ноинсоний ҳужум оқибатида олган», — дейилади хабарда.
Сан-Сальвадор ҳайвонот боғи шифокорлари пайшанба куни Густавито ўзини ғалати тутаётганига эътибор берди. Бегемот сувдан чиқмасдан, овқат ейишдан бош тортди. Кўрик вақтида ветеринарлар ва биологлар ҳайвоннинг бошида ва танасида ҳужум натижасида олинган шишлар ва жароҳатлар борлигини аниқлади.
Ҳодиса натижасида ҳайвонот боғи вақтинча ёпилди. Бегемотнинг ўлими Сальвадор аҳолисининг қайғусига сабаб бўлди. Кўплаб кишилар ҳайвонот боғига шам ёқиш учун келди.
«РИА Новости»нинг хабар беришича, 16 ёшли бегемот ҳайвонот боғига ташриф буюрувчиларнинг севимли ҳайвони бўлган. Ҳодиса юзасидан суриштирув ишлари бошланди.
«Дарё»нинг Telegram’даги расмий канали — @toshqindaryo’га аъзо бўлинг!
Изоҳ (0)