Мақолада барча даврларнинг энг қимматбаҳо соатлари билан танишишингиз мумкин.
5-ўрин. Patek Philippe Caliber 89 — 1989 йилда Швейцариянинг Patek Philippe компаниясининг 150 йиллигига бағишлаб чиқарилган икки циферблатли чўнтак соати. Корпуси сариқ, пушти, оқ олтин ҳамда платинадан тайёрланган соат атиги тўрт нусхада чиқарилган. 9 йил давомида ясалиб, 126 та қимматбаҳо тош билан безатилган аксессуарнинг нархи 5 миллион долларга тенг.
4-ўрин. Patek Philippe Reference 1527 — 1943 йилда чиқарилган ва 23 та қимматбаҳо тошдан фойдаланиб тилладан ясалган классик қўл соати абадий тақвим ва ой фазалари кўрсаткичи билан жиҳозланган. 2010 йил майидаги кимошди савдосида соат 5,63 миллион шартли бирликка сотиб олинди.
3-ўрин. Patek Philippe Henry Graves Supercomplication — 1932 йилда нью-йорклик банкир Генри Грэйвз буюртмасига кўра ясаб чиқарилган соат. Беш йил давомида 18 каратли олтиндан тайёрланган ва 900 та деталдан ташкил топган соат 1999 йилда Sotheby’s кимошди савдосида 11 002 500 долларга сотиб олинган, у айни пайтда Швейцариянинг Женева шаҳридаги соатлар музейида сақланмоқда.
2-ўрин. 201-carat Chopard — жами 200 каратлик 874 та бриллиант билан қопланган билагузук соат 25 миллион долларга баҳоланмоқда.
1-ўрин. Швейцариянинг Jaegar-LeCoultre брендига тегишли Joaillene Manchette соатининг тахминий нархи 26 миллион долларга тенг. Соатнинг оқ олтиндан ишланган боғичига 576 та бриллиант ва 11 та оникс кристаллари ўрнатилган, кумуш циферблати эса ёқут шиша билан қопланган.
Изоҳ (0)