АҚШ Марказий разведка бошқармаси директори Майкл Помпео The Wall Street Journal газетасида Америка махсус хизматлари президент Дональд Трампдан ўзлари тўплаган маълумотнинг бир қисмини сир тутаётгани ҳақида чоп этилган хабарни қатъиян рад этди, деб ёзади «ТАСС».
Помпео таъкидлашича, «МРБнинг вазифаси президентни иложи борича кўпроқ разведка маълумотлари билан таъминлаш ва ушбу маълумотлар таянган асосни тушунтириб беришдан иборат». «МРБ президентдан разведка маълумотларини яширмаяпти, яширмаган ва ҳеч қачон яширмайди. Нуқта», — дейилади Помпеонинг баёнотида.
The Wall Street Journal версиясига кўра, Америка разведка органлари баъзи махфий маълумотлар тарқалиб кетишидан хавотирланиб, Трампга уларни тақдим этмаган. Хусусан, Трампга «разведка муассасалари ахборот тўплашда қўллайдиган услублар», шу жумладан, бошқа давлатларга нисбатан жосуслик олиб бориш усуллари ҳақида гапириб беришмаган.
Изоҳ (0)